بەپێی هەواڵی کوردپرێس، نازم عومەر دەباغ، نوێنەری حکوومەتی هەرێمی کوردستان لە کۆماری ئیسلامیی ئێران بە تۆڕی میدیایی رووداوی راگەیاند: "ئێستا پەیوەندییەکانی نێوان هەرێمی کوردستان و کۆماری ئیسلامیی ئێران زۆرباشە و هاتووچۆی دیپلۆماسی و بازرگانی لەنێوان هەردوولا بەردەوامە."
نازم دەباغ گوتی: "کۆماری ئیسلامیی ئێران چەند جارێک پەیامیان بۆ جێبەجێ‌کردنی خاڵەکانی ئەو رێککەوتنە پێداوم و منیش پەیامەکەم بۆ هەولێر ناردووە، جێبەجێ‌کردنی رێککەوتنەکە پەیوەندییەکانی نێوان هەولێر و تاران دەباتە قۆناخێکی نوێوە و بەهێزتری دەکات".
نوێنەری حکوومەتی هەرێمی کوردستان لە تاران ئاماژەی بەوەش کرد، "کۆبوونەوەکانی سەرۆکی هەرێمی کوردستان لەگەڵ باڵیۆزی ئێران لە عێراق و سەردانەکەی بافڵ تاڵەبانی، سەرۆکی یەکێتیی نیشتمانیی کوردستان بۆ تاران، گەواهی باشتربوونی پەیوەندییەکانی نێوان هەردوولا دەدەن".
شایانی باسە رۆژی ۱۹ـی ئاداری ۲۰۲۳ لە بەغدا، عێراق و ئێران کۆنووسێکی ئەمنیی هاوبەشیان واژۆکرد، کە قاسم ئەعرەجی، راوێژکاری ئاسایشی نیشتمانیی عێراق و عەلی شەمخانی، سکرتێری ئەوکاتی ئەنجوومەنی ئاسایشی نیشتمانیی ئێران واژۆکەیان کرد. یاداشتەکە هاوئاهەنگی لە ڕووی پاراستنی سنووری هاوبەشی نێوان هەردوو وڵاتی لەخۆگرتووە.
Your Comment