بەپێی هەواڵی کوردپرێس، هاوپه‌یمانی چوارچێوه‌ی هه‌ماهه‌نگی، له نووسینگه‌ی هومام حەموودی کۆبو‌وه‌ته‌وه، له سه‌ره‌تادا محه‌مه‌د شیاع سوودانی، سه‌رۆک وه‌زیرانی عێراق، دوا پێشهاته سیاسی و خزمه‌تگوزارییه‌کانی بۆ ئاماده‌بووانی کۆبوونه‌وه‌که خستووه‌ته‌ڕوو.
چوارچێوه‌ی هه‌ماهه‌نگی سه‌رله‌نوێ پشتیوانی خۆی بۆ جێبه‌جێ کردنی یاسای بوودجه‌ی فیدڕاڵی له‌لایه‌ن حکوومه‌ته‌وه دووپات‌کردووه‌ته‌وه و به پێویستی زانیوه هه‌ر چی زووه په‌له بکرێت له جێبه‌جێ‌کردنی ئه‌و بوودجه‌یه به مه‌به‌ستی خزمه‌ت‌کردنی هاوڵاتیان.
چوارچێوەی هەماهەنگی، بەپێویستی زانیوه مامه‌ڵه‌کردن له‌گه‌ڵ بڕیاره‌کانی حکوومه‌ت و په‌یوه‌ندییه نێوده‌وڵه‌تییه‌کانی عێراق ناوه‌ندی بێت.
ئەم خواستەی چوارچێوەی هەماهەنگی، لە کاتێکدایە لە عێراقدا سیستەمی فیدراڵی هەیە و پەیوەندییەکانیش ناوەندی نین و جگە لە بەغدا، هەولێری پایتەختی هەرێمی کوردستان، ناوەندێکی سەرەکی پەیوەندییە هەرێمی و نێودەوڵەتیەکانە.
لەمبارەوە چاودێرێکی سیاسی بە "زەمەن"ی ڕاگەیاند: ئەگەر تەواوی پەیوەندییەکانی عێراق بە ناوەندی بکرێن، ئەوا قۆناغێکی دیکەی لە قاڵبدانی هەرێمی کوردستان دەبێت و لە دوای دەستبەسەرداگرتنی نەوت و هەڵوەشاندنەوەی پەرلەمان، دەبێتە زەبرێکی کوشندە بۆ هەرێمی کوردستان.
Your Comment