بەپێی هەواڵی کوردپرێس، گوڵستان سەعید، سەرۆکی فراکسیۆنی گۆڕان لە پەرلەمانی کوردستان، لە لێدوانێکیدا بۆ ڕۆژنامەنووسان باسی لە دۆخی سیاسی حزبەکە و ئامادەکارییەکانیان بۆ هەڵبژاردنی داهاتوو کرد.

 ناوبراو ڕایگەیاند، پێویستە گۆڕان هەڵسەنگاندن بۆ کۆی هەڵوێست و بڕیارەکانی ڕابردووی بکات، چوونکە کۆمەڵێک بڕیاری هەڵە دراون و دانیشمان بە هەڵەکانماندا ناوە.

 گوڵستان سەعید وتیشی: "یەکێک لە هەڵەکان ئەو هاوپەیمانێتییە بوو کە لە هەڵبژاردنی پێشوودا لەگەڵ یەکێتی کردمان" بۆیە جەختی کردەوە لەوەی بەنیازنین لەگەڵ هیچ حزبێکی دەسەڵاتدا بچنە هاوپەیمانییەوە.

 ناوبراو ئەوەشی خستەڕوو: گۆڕان لە هەوڵی ڕێکخستنەوەی ڕیزەکانی و ئاشتەواییەکی فراواندایە لەگەڵ ئەو ئەندام و لایەنگرانەی لە حزبەکە نیگەران بوون.