کوردپرێس:

ماڵپەڕی تایبەتی وەزارەتی دەرەوەی ئەمریکا لە بابەتێکدا نووسیویەتی جەیمز جێفری نوێنەری تایبەتی ئەمریکا لە هاوپەیمانیی نێودەوڵەتیی دژەداعش پرێس کۆنفڕانسێکی کردووە و بەبۆنەی کوژرانی دوو ئەفسەری کوردی سوپای عێراقەوە کە لە هێرشی فڕۆکەی تورکیا کوژران سەرەخۆشیی کرد.

جەیمز جێفری ڕەواییی بە هێرشەکانی تورکیا بۆ سەر خاکی هەرێمی کوردستان دا و لەو بارەیەوە داوای لە ئەنقەرە کرد بۆ هێرش کردنی دوبارە هەماهەنگی و هاوکاریی عێراق وەربگرێت.

نوێنەری تایبەتی ئەمریکا لە کاروباری سووریا لەبارەی ڕێککەوتنی نەوتیی نێوان کۆمپانیا ئەمریکییەکە و کوردەکانی سووریا وتی: خەڵکی سووریا خاوەنی نەوتی ئەو وڵاتەن و ئەمریکاش پێبەندە بە پارێزگاری کردن لە سەروەری و یەکپارچەییی خاکی سووریا. دەوڵەتی ئەمریکا جگە لە دەرکردنی مۆڵەت بۆ کۆمپانیایێکی نەوتی هیچی دیکەی نەکردووە و ئەو دەوڵەتە نە نەوتی سووریای کۆنتڕۆڵ کردووە و نە بۆ کۆنتڕۆڵ کردنی سامانی سروشتیی سووریاش هەنگاوێکی ناوە.

ناوبراو هەروەهاش لەبارەی دۆخی باکووری خۆرهەڵاتی سووریا و ڕێککەوتن و لێکگەیشتنی ئەو وڵاتە لەگەڵ کوردەکان و تورکیا و ڕووسیا ڕەزامەندیی نیشان دا.