بەپێی هەواڵی کوردپرێس، تۆڕی میدیایی رووداو کە لەگەڵ سەرچاوەیێکی نێو سەرکردایەتی یەکێتی قسەی کردووە، لە کۆبوونەوەکەی ئەنجومەنی سەرکردایەتیی یەکێتی کە لە قەلاچوالان بەڕێوەچووە، تاوتوێی چەند تەوەرێک کراوە لەوانە: کێشە نێوخۆییەکانی یەکێتی و هەروەها تاوتوێی پەیوەندییەکانیان لەگەڵ بەغدا و هەروەها لەگەڵ پارتی کردووە و بڕیاریان داوە کە کۆبوونەوەکانیان لەگەڵ پارتی بەردەوام بێت.

ئەو سەرچاوەیەی نێو کۆبوونەوەکەی ئەنجومەنی سەرکردایەتیی یەکێتی کە نەویست ناوی ئاشکرا بکرێت بە رووداوی راگەیاندووە: "لە کۆبوونەوەکەدا دەنگدان لەسەر دوو بابەت کراوە، ئەوانیش سڕکردنی مەلا بەختیار، ئەندامی ئەنجوومەنی باڵای سیاسی و بەرژەوەندییەکانی یەکێتی ئەمەش بەهۆی بڵاوکردنەوەی کتێبەکەی لە ماوەی رابردوودا بەناوی (لەبری بیرەوەری). هەروەها لە کۆبوونەوەکەدا ئاگادارکردنەوە بۆ هەریەکە لە قوباد تاڵەبانی و رێواز فایەق کراوە بەهۆی پابەندنەبوونیان بە بڕیارەکانی حیزب."

ئەو سەرچاوەیە ئاماژەی بەوەش دا "هەرچەندە بەزۆرینەی دەنگ پەسندکراوە، بەڵام هێشتا ناکۆکی لەسەر ئەوە هەیە کە راگەیێندراو لەبارەی کۆبوونەوەکەی ئەنجومەنی سەرکردایەتیی یەکێتی و ئەو دوو بابەتە بڵاوبکرێتەوە یاخود نا."

لاهوور شێخ جەنگی، هاوسەرۆکی یەکێتیی نیشتمانیی کوردستان سەبارەت بە کۆبوونەوەکە ئاماژە بەوە دەدات کە لە کۆبوونەوەکەدا باسی پرسی ناوخۆی حیزب کراوە و دەشڵێت "کۆبوونەوەی ئەنجومەنی سەرکردایەتی بە سەرۆکایەتی بافڵ تاڵەبانی و بەندە بەڕێوەچووە، کۆبوونەوەکەش دوا گۆڕانکاری و پێشهاتەکانی لە هەرێمی کوردستان و بەغدا تاوتوێ کرد و باس لە پرسی مووچەی فەرمانبەرانی هەرێمی کوردستان کرا".

کۆدی هەواڵنێر: 60113