بەپێی هەواڵی کوردپرێس، سەعدی پیرە، ئەندامی ئەنجومەنی سەرکردایەتیی یەکێتی بە تۆڕی میدیایی رووداوی رایگەیاند "بیرۆکەی هاوسەرۆکی لە ئەنجامی بارودۆخی ئێستای یەکێتییەوە سەری هەڵداوە".

سەعدی پیرە بڕیاری هاوسەرۆکایەتی بە بڕیاری ئەنجومەنی سەرکردایەتیی یەکێتی دەزانێت و دەڵێت، بڕیارەکە لە دەرەوە نەهاتووە "124 کەس لە ژوورەوە دانیشتوون و ئەوان بڕیاردەدەن. یەکێتی ئێستا پێویستی بەو سیستەمەیە".

یەکێتی بابەتی جێندەری لە هاوسەرۆکی پەیڕەو ناکات، سەعدی پیرە دەڵێت، لەنێو یەکێتی شاراوە نییە ناکۆکی باڵەکان هەن "باڵەکانی یەکێتی لەسەر دەسەڵات ناکۆکن و لەبارەی فیکر ناکۆک نین".

لەبارەی دوورخستنەوەی بەرهەم ساڵح، لە هاوسەرۆکی یەکێتی، ئەو ئەندامەی ئەنجومەنی سەرکردایەتیی یەکێتی ئاماژەی بەوە کرد "دکتۆر بەرهەم ئاوت نەکراوە، وەزیفەی هەیە لە بەغدا و دکتۆر بەرهەم خۆی سەرەتا بەم سیستەمە رازی نەبوو".

لەبارەی دانانی جێگر بۆ هاوسەرۆکی یەکێتی، سەعدی پیرە گوتی "باسی دانانی جێگری هاوسەرۆک نەکراوە".

لە وەڵامی ئەو پرسیارەی ئایا کۆنگرە باڵە ناکۆکەکان یان ناکۆکییەکانی قووڵترکردەوە یان تەنکی کردەوە؟ سەعدی پیرە گوتی، "تەنکی کردەوە و تەنکتریشی دەکاتەوە".

بەگوتەی سەعدی پیرە، ناکۆکییەکان زیاتر لەنێو چینە باڵاکەی یەکێتین و لەنێو چەند کەسێکدان "رەنگە زۆر کەمتر پەیوەندی بە قاعیدە هەبێت ئەوەی کە ئێستا هەیە، رەنگە زیاتر پەیوەندی بە ئاستی باڵای یەکێتییەوە هەبێت، چونکە کێشەکە لەسەر ئەوە نییە کێ ببێتە ئەندام مەڵبەند و کێ ببێتە مەسئول کۆمیتە، بابەتەکە لەسەر ئەوەیە کێ ببێتە سەرۆک و کێ ببێتە جێگر".

لەبارەی ئەوانەی خواستی سەرۆکایەتی کردنی یەکێتییان هەیە، سەعدی پیرە ئاماژەی بەوە کرد، "کاک بافڵ و کاک لاهوور بە مافی خۆیان دەزانن... دەڵێن ئێمە هیلاک بووین و کار دەکەین، دەنگی زۆرینەشمان بەدەست هێناوە. کاک بەرهەم دەڵێت من سەرۆککۆمارم و ناوبانگێکی نێودەوڵەتیم هەیە.. کاتی ئەوە هاتووە سوودێک بگەیێنم. کاک کۆسرەتە ئەویش بە حوکمی ساڵانی رابردوو کە یەکێکە لە سەرکردە ناسراوەکانی یەکێتی".

کۆدی هەواڵنێر: 60113