به‌پێی هه‌واڵی کوردپرێس، ڕێناس جانۆ وته‌بێژی فراكسیۆنی پارتی له ئه‌نجومه‌نی نوێنه‌رانی عێراق به SNNی ڕاگه‌یاند: كێشه‌ی سه‌ره‌كیی ئێمه له به‌رامبه‌ر بڕیاره‌كه‌ی ئه‌نجومه‌نی نوێنه‌ران و هه‌مواركردنه‌وه‌ی سێیه‌می یاسای هه‌ڵبژاردن هه‌ڵوه‌شاندنه‌وه‌ی ده‌نگدانی تایبه‌ته له هه‌رێمی كوردستان.
وته‌بێژی فراكسیۆنی پارتی ڕه‌تی كرده‌وه یه‌كلاكردنه‌وه‌ی ئه‌نجامی هه‌ڵبژاردنه‌كان له‌لایه‌ن دادگای فیدراڵییه‌وه قورس بێت و وتی: "یه‌كلا كردنه‌وه‌ی پرۆسه‌كه له‌لایه‌ن دادگای فیدراڵییه‌وه ده‌بێت چوونكه ئه‌و دادگایه بڕیاری كۆنكرێتی و كۆتایی هه‌یه، هیچ به لایه‌وه قورسیش نییه و پێشتریش چه‌ندین بڕیاری یه‌كلاكه‌ره‌وه‌ی له‌سه‌ر پرسه ناكۆكه‌كان داوه".
ئه‌و په‌رله‌مانتاره‌ی پارتی له‌باره‌ی په‌رچه‌كرداری بڕیاره‌كه‌ی دادگای فیدراڵی كه چاوه‌ڕوان ده‌كرێت له چه‌ند ڕۆژی داهاتوودا بڕیاری كۆتایی بدات ده‌ڵێت: "ئه‌گه‌ر پرۆسه‌كه ته‌ندروست و به بێ ده‌ستێوه‌ردان بێت هیچ كاردانه‌وه‌یێكی لێناكه‌وێته‌وه به‌ڵام ئه‌گه‌ر گۆڕانكاری گه‌وره ڕوو بدات مه‌ترسیی پێكدادان هه‌یه هه‌رچه‌نده سه‌رجه‌م لایه‌نه‌كان خۆیان له شه‌ڕ و توندوتیژی ده‌پارێزن ".
به وته‌ی ڕێناس جانۆ تا ئێستا دادگای فیدراڵی هیچ واده‌یێكی بۆ بڕیاردان له‌سه‌ر هه‌ڵوه‌شاندنه‌وه‌ی ئه‌نجامی هه‌ڵبژاردن و په‌سه‌ند كردنی هه‌مواری سێیه‌می یاسای هه‌ڵبژاردن دیاری نه‌كردوووه.
کۆدی هه‌واڵنێر: 60103
Your Comment