به‌پێی هه‌واڵی کوردپرێس، ده‌رهێنه‌ر جوبرائیل ئه‌بوبه‌كر له‌باره‌ی وه‌رگرتنی ئه‌و خه‌ڵاته‌وه وتی: "فیلمی (ئه‌یلان) له فێستیڤاڵی كلات نیسای سینه‌مایی كه له وڵاتی ئیتاڵیا به‌ڕێوه چوو، خه‌ڵاتی باشترین فیلمی وه‌رگرت".
وتیشی: "له فێستیڤاڵه‌كه‌دا 437 فیلم به نوێنه‌رایه‌تیی 60 وڵاتی جیهان به‌شدارییان كرد و له‌نێو ئه‌و فیلمانه‌دا فیلمی (ئه‌یلان) خه‌ڵاتی باشترین فیلمی پێبه‌خشرا".
جوبرائیل ئه‌بوبه‌كر له‌باره‌ی چیرۆكی فیلمه‌كه‌وه ده‌رهێنه‌ر وتی: "چیرۆكی فیلمه‌كه باس له ئه‌یلان كوردی ده‌كات كه له سووریا شه‌ڕ ده‌ست‌پێده‌كات له‌گه‌ڵ خێزانه‌كه‌ی رێگه‌ی تاراوگه ده‌گرنه‌به‌ر و به‌ره‌و توركیا به‌ڕێ ده‌كه‌ون، به‌ڵام له‌وێ به‌رله‌وه‌ی بگه‌ن به كه‌ناری ئارامی شه‌پۆله‌كانی ده‌ریا ده‌یكاته قوربانی".
فیلمی سینه‌مایی (ئه‌یلان) له‌لایه‌ن جوبرائیل ئه‌بوبه‌كر كاری ده‌رهێنانی بۆ كراوه و ئومێد رۆژ كاری مۆسیقای فیلمه‌كه‌ی جێبه‌جێ كردوووه و هه‌روه‌ها ئالان رۆژبه‌یانی كاری گرافیک و دیزاینی فیلمه‌كه‌ی جێبه‌جێ كردوووه.
دواهه‌مین فیلمی سینه‌مایی ده‌رهێنه‌ر جوبرائیل ئه‌بوبه‌كر فیلمێک بوو به‌ناوی (بێده‌نگی ئاسمان) كه له كه‌متر له ساڵێكدا له 54 فێستیڤاڵی سینه‌مایی جیهانیدا به‌شداری كرد و چه‌ندین خه‌ڵاتی به‌ده‌ستهێنا.
جوبرائیل ئه‌بوبه‌كر ره‌حمان له دایكبووی ساڵی 1983ی شاری هه‌ولێره، له ساڵی 2001ه‌وه ده‌ستی داوه‌ته كاری سینه‌مایی و له نزیكه‌ی 40 كورته فیلمدا یاریده‌ده‌ری وێنه‌گر بوووه و له 13 فیلمی سینه‌مایی درێژیشدا یاریده‌ده‌ری وێنه‌گر بوووه و له ساڵی 2010ه‌وه كاری ده‌رهێنانی سینه‌مایی ده‌كات.
کۆدی هه‌واڵنێر: 60104
Your Comment