به‌پێی هه‌واڵی کوردپرێس، میخائیل بۆگدانۆف جێگری وه‌زیری کاروباری ده‌ره‌وه‌ی ڕووسیا و نوێنه‌ری سه‌رۆک کۆماری ئه‌و وڵاته له ڕۆژهه‌ڵاتی ناوه‌ڕاست پێشنیوه‌ڕۆی ڕۆژی (سێشه‌ممه) بۆ هه‌واڵنێرانی ڕاگه‌یاند که په‌یوه‌ندییه‌کانی نێوان وڵاته‌که‌ی، ئه‌مریکا و ئوردون هاوپه‌یوه‌ند به ناوچه‌ی دابه‌زینی ته‌نگژه له باشووری سووریا هێشتاکه به‌رده‌وامه.
بۆگدانۆف ئاماژه‌ی دایه پشتیوانی موسکۆ له ڕوانگه‌ی به‌ڕێوه‌بردنی کۆبوونه‌وه‌ی سێ قۆڵی له‌گه‌ڵ واشنتۆن و عه‌مان بۆ گفتوگۆ له‌باره‌ی ناوچه‌ی دابه‌زینی ته‌نگژه له باشووری سووریا که هاوسنووری ئوردون و ناوچه داگیرکراوه‌کانه و وتی: په‌یوه‌ندییه دوو لایه‌نه‌کانی ڕووسیا له‌گه‌ڵ ئوردون و ئه‌مریکا درێژه‌ی هه‌یه و له سه‌ر به‌ڕێوه‌چوونی کۆبوونه‌وه‌ی نوێنه‌رانی سێ وڵاتیش ڕێککه‌وتن کراوه.
جێگری وه‌زیری ده‌ره‌وه‌ی ڕووسیا کاتێکی دیاری کراوی بۆ به‌ڕێوه‌چوونی کۆبوونه‌وه له‌گه‌ڵ ئه‌مریکا و ئوردون و ئاستی به‌شداری کردنی ڕانه‌گه‌یاندوووه و ڕوونیشی کرده‌وه که ئه‌و کۆبوونه‌وه‌یه هه‌رچی زووتر به‌ڕێوه بچێت باشتره و ده‌بێ هه‌موو وڵاتان له ئاستێکی گونجاودا به‌شداری بکه‌ن.
سه‌رچاوه: سپۆتنیک
کۆدی هه‌واڵنێر: 60104
Your Comment