به‌پێی هه‌واڵی کوردپرێس، شه‌وی ڕابردوو دوای كۆتایی هاتنی پرۆسه‌ی ده‌نگدان و ئه‌نجامه نافه‌رمییه‌كانی هه‌ڵبژاردنه‌كه، سه‌رجه‌م لایه‌نه سیاسییه‌كان یه‌كێتییان تۆمه‌تبار كرد به ئه‌نجامدانی ساخته‌كاری و هاک كردنی سیسته‌می ئه‌لیكترۆنی ده‌نگدانه‌كه.
له‌وباره‌یه‌وه سه‌عدی ئه‌حمه‌د پیره وته‌بێژی فه‌رمیی یه‌كێتی به SNNی ڕاگه‌یاند: "جارێ یه‌كه‌م به‌هه‌ڵه‌داچوونی ئه‌نجامی پێشبینی‌كراوی ئه‌و لایه‌نه سیاسییانه‌یه كه پێیان وابوو یه‌كێتی كۆتایی هات و خه‌ریكن میراته‌كه‌ی دابه‌ش ده‌كه‌ن".
ناوبراو وتیشی: "به ته‌ئكید پرسی هه‌ڵبژاردنه‌كان پێویستی به لێكۆڵینه‌وه هه‌یه نه‌ک ته‌نها له سلێمانی و که‌رکووک به‌ڵكوو له سه‌رجه‌م كوردستان، ناشزانین بۆچی پارتی بۆ كه‌ركووک فرمێسكی تیمساحی ده‌ڕێژێت له كاتێكدا تاكه كاندیدێكیشی نییه بۆیه ئێمه‌ش پێمانوایه ئه‌گه‌ر وردبینی بكرێته‌وه ده‌بێت له هه‌ولێر و مووسڵ و كه‌مپی ئاواره‌كان بێت".
وته‌بێژی یه‌كێتی ئاماژه‌ی به‌وه‌ش كرد "ده‌بێت وردبینییه‌كه به تایبه‌ت له‌و شوێنانه بكرێت كه هێزی ئاسایش و پێشمه‌رگه داخڵی كه‌مپه‌كان بوون، ئێمه به هیچ شێوه‌یێک نیگه‌ران نین كه وردبینییه‌كه له سلێمانی و که‌رکووک بكرێت به‌ڵام ناكرێت به پڕوپاگه‌نده‌ی ژماره‌یێک كه‌ناڵی نزیک له پارتی دۆخێک دروست بكرێت كه گوایه هه‌موو دونیا شامی شه‌ریفه ته‌نها له‌و جێگایانه نه‌بێت كه له ژێر ده‌ستی یه‌كێتیدایه."
سه‌عدی ئه‌حمه‌د پیره سه‌باره‌ت به تۆمار كردنی سكاڵای یاسایییش له‌سه‌ر ئه‌و لایه‌ن و ڕاگه‌یاندنانه‌ی ته‌شهیر و ناوزڕاندنیان به‌رامبه‌ر به یه‌كێتی كردوووه وتی: "یه‌كێتی سكاڵای یاسایی تۆمار كردوووه له‌سه‌ر سه‌رجه‌م ئه‌و لایه‌ن و میدیایانه‌ی ته‌شهیریان به یه‌كێتی كردوووه".
کۆدی هه‌واڵنێر: 60103
Your Comment