به‌پێی هه‌واڵی کوردپرێس، ده‌وڵه‌ت باخچه‌لی سه‌رۆكی گشتیی مه‌هه‌په له كۆبوونه‌وه‌ی فراكسیۆنی پارته‌كه‌ی له په‌رله‌مانی توركیا، ڕوونكردنه‌وه‌ی سه‌باره‌ت به مژاره‌كانی رۆژه‌ڤ دا.
ده‌وڵه‌ت باخچه‌لی پێشنیاری كرد هه‌ڵبژاردنی سه‌رۆكایه‌تیی كۆمار و په‌رله‌مان رۆژی ٢٦ی ئاب ئه‌نجام بدرێت.
ناوبراو جه‌ختی له‌وه‌شكرده‌وه كه مافی خۆی بۆ بڕیاردان له به‌رژه‌وه‌ندیی پێشخستنی هه‌ڵبژاردنه‌كان به‌كارده‌هێنێت و رایگه‌یاند: "له دوای ده‌رچوونی یاسای گونجاو و پێویست، مه‌هه‌په مافی پێزانین و بژارده بۆ پێشخستنی هه‌ڵبژاردنه‌كان به‌كارده‌هێنێت. پێویست ناكات ئه‌م كاره له‌وه زیاتر درێژه بكێشێت. مه‌رج ئه‌وه‌یه یاری ئه‌وانه تێک بدرێت كه له ئاژاوه ده‌گه‌ڕێن. كاتی ئه‌وه هاتوووه مشتومڕ و لێكتێنه‌گه‌یشتن له باره‌ی "هه‌ڵبژاردن ده‌كرێت یان نا، پێش ده‌خرێت یان له كاتی خۆیدا ئه‌نجام ده‌درێت؟ كۆتایی پێ بهێندرێت".
باخچه‌لی له باره‌ی به‌رواری گریمانه‌كراوی ئه‌وان بۆ هه‌ڵبژاردن، رایگه‌یاند: "رۆژی یه‌كشه‌ممه ٢٦ی ئابی ٢٠١٨، واته له ساڵیادی سه‌ركه‌وتنی ماڵازگرت و به‌ره‌نگارییه مه‌زنه‌كه‌ماندا، گه‌لی تورک به رۆحییه‌تێكی نوێی سه‌ركه‌وتنه‌وه بچێته سه‌ر سندوقی ده‌نگدان و به‌شداری له هه‌ڵبژاردنی سه‌رۆكایه‌تیی كۆمار و په‌رله‌ماندا بكات، گونجاوترین، لۆجیكیترین، ئاقڵانه‌ترین و دیموكراتیترین رێگه‌ی دانه‌وه‌ی وه‌ڵامێكی شایسته‌یه به دوژمنانی توركیا".
ده‌وڵه‌ت باخچه‌لی ڕاشی‌گه‌یاند: "ئه‌و چالاكیی دانیشتنه‌ی جه‌هه‌په به بیانووی باری نائاسایی ده‌ستی‌پێكردوووه، له ڕووی بیرۆكه‌وه ناته‌واوه، له‌ڕووی ره‌وشته‌وه نه‌گونجاوه و له‌ڕووی رۆحییه‌وه نه‌خۆشییه. رێپێوانیان كرد، سه‌ری نه‌گرت بۆیان، ئێستا ده‌ستیان به دانیشتن كردوووه. ئه‌مانه كه داده‌نیشن نازانن هه‌ستن و كه هه‌ڵده‌ستن نازانن رێبكه‌ن".
کۆدی هه‌واڵنێر: 60104
Your Comment