«قەدری جان» ئەندامی ئەنجومەنی نیشتمانیی کوردی سووریا (ENKS) لە قامیشلۆ لە وەڵامی پرسیارێکی کوردپرێسدا کە ئایا وتەکانی «ویلیام روێبوک» بەرپرسی پێشووی ئەمریکا بۆ کاروباری سووریا کە بە شەرقولئەوسەت-ی وتبوو: "ئێمە ڕاشکاوانە بە هێزەکانی سووریای دیموکراتمان وتووە پشتگیری لە دامەزراندنی دەوڵەتێکی کوردی لەم ناوچەیەدا ناکەین". چۆن هەڵدەسەنگێنن، وتی: جەنابی روێبوک ئێستا ڕۆڵێکی لە ئیدارەی ئەمریکادا نییە، بەڵام بەڕای من گۆڕانکارییێک لە ستراتێژیی سیاسەتی دەرەوەی ئەمریکادا ڕوونادات.

ناوبراو درێژەی دا: توێنەری نوێی ئەمریکا بۆ کاروباری دانوستانی نێوان لایەنە کوردییەکانی سووریا هاتۆتە ناوچەکە و گفتوگۆکانی لەگەڵ لایەنە جیاوازەکاندا دەست پێکردووە بەڵام هێشتا هیچ باسێک لە ئامانجەکانی ئەمریکا نەکراوە.

ئەندامی ئەنجومەنی نیشتمانیی کوردی سووریا (ENKS) ڕاشیگەیاند: دوو ڕۆژ بەر لە ئێستا وەزارەتی بەرگریی ئەمریکا (پێنتاگۆن) لە بەیاننامەیێکدا ڕایگەیاند ئامانجی ئەمریکا پاراستنی بیرە نەوتەکانی باکووری سووریا نییە بەڵکوو بۆ شەڕی داعش لە سووریایە.

قەدری جان ڕایگەیاند: ڕاگەیێندراوەکەی پێنتاگۆن هەڵگری پەیامێکە بۆ پەیەدە کە لە دانوستانی لایەنە کوردییەکاندا کارشکێنی دەکات و هەروەها هەڵگری پەیامە بۆ تورکیا و ڕووسیا.

ناوبراو ئاشکرای کرد: هەموو ڕۆژێک وجبەیێک لە بارهەڵگر و کەرەستەی جەنگیی ئەمریکا دەگەنە کوردستانی سووریا و ئەمەش بەمانای ئەوەیە کە ئەمریکا لە ئێستادا بەنیازی چۆڵ کردنی سووریا نییە.

کۆدی هەواڵنێر: 60113