بەپێی هەواڵی کوردپرێس، مەسعوود بارزانی سەرۆکى پارتى دیموکراتى کوردستان لە پەیامێکدا لەبارەى دۆخى عێراقەوە رایگەیاند: بە بایەخەوە بەدواداچوون بۆ پەرەسەندنەكانی ئەم دوایە دەكەن و پێشوازی لە هەر هەنگاوێكیش دەكەن كە كاریگەری لەسەر چارەسەركردنی قەیرانەكە هەبێت.
بارزانی راشیگەیاند: ڕێگەنادرێت لە ڕووخان و فەوزا یان گەڕانەوە بۆ سەردەمی دیكتاتۆرییەتی شووم بێت.
لە پەیامەکەیدا سەرۆکی پارتی دیموکرات دەڵێت: "پشتگیرى لە گۆڕانکارییێک دەکەین کە ئامانج لێی چەسپاندنی ئاسایش و سەقامگیری و باڵادەستیی یاسا بێت و داواكارییە ڕەواكانی جەماوەری بەشخوراویش بەدی بهێنێت".
لە کۆتاییدا مەسعوود بارزانی زیادی دەکات "هەر لێرەدا ئیدانەی توندوتیژییە بەردەوامەكان و كوشتنی خەڵكی بێگوناح دەكەین و سەرەخۆشیش لە كەسوكاری شەهیدان دەكەین و هیوای چاكبوونەوەی خێرایش بۆ برینداران دەخوازین".
دواى دوومانگ خۆپیشاندان و نارەزایى ئه‌مڕۆ شه‌ممه، ٣٠ی تشرینی دووه‌می ٢٠١٩، ئه‌نجومه‌نی وه‌زیرانی عێراق به سه‌رۆكایه‌تیی عادل عه‌بدولمه‌هدی، كۆ بووه‌وه و تیایدا گفتوگۆ له‌سه‌ر پرسی ده‌ستله‌كاركێشانه‌وه‌ی عه‌بدولمه‌هدی، كراوە و بریاریشە سبەینێ نامەى دەستلەکارکێشانەوەکەى لە کۆبوونەوەى پەرلەماندا پیشکەش بکات.
کۆدی هەواڵنێر: 60113
Your Comment