به‌پێی هه‌واڵی کوردپرێس، ئه‌یاد عه‌لاوی له لێدوانێکدا بە ڕۆژنامه‌ی "الریاض"ی عه‌ره‌بستانی وت: حه‌یده‌ر عه‌بادی، سه‌رۆک وه‌زیرانی عێراق داوای یه‌کێک له ڕێبه‌رانی وڵاتانی عه‌ره‌بی بۆ نێوبژیڤانی کردن له چاره‌سه‌رکردنی ململانێی به‌غدا-هه‌ولێر و گفتوگۆ له‌گه‌ڵ مه‌سعوود بارزانی، سه‌رۆکی پێشووی هه‌رێمی کوردستانی ڕه‌ت کرده‌وه.
عه‌لاوی ئاماژه‌ی دایه ئه‌وه‌ی که له دیداری ئه‌م دواییه‌ی له‌گه‌ڵ فوئاد مه‌عسووم، سه‌رۆک کۆماری عێراق باسی هه‌ڵبژاردنی په‌رله‌مانی کردوووه و زیادی کرد: دوو ڕوانگه بۆ ئه‌و هه‌ڵبژاردنه هه‌یه که یه‌کێکیان دواخستنی هه‌ڵبژاردن بۆ ماوه‌یێکی کورت و ئه‌وی دیکه‌ش به‌ڕێوه‌چوونی هه‌ڵبژاردن له ماوه‌ی دیاری کراودایه.
جێگری سه‌رۆک وه‌زیرانی عێراق وتیشی: مه‌سعوود بارزانی له دۆخێکی نه‌گونجاودا گشتپرسیی له هه‌رێمی کوردستان به‌ڕێوه برد و ئه‌وه‌ش ده‌ره‌نجامێکی باشی نه‌بوو و هه‌ر بۆیه‌ش ده‌ستبه‌جێ وازی له جێبه‌جێ کردنی ئه‌نجامی گشتپرسی هێنا.
ناوبراو زیادیشی کرد: لەسەر داوای من بڕیار بوو یه‌کێک له ڕێبه‌رانی وڵاتانی عه‌ره‌بی، عه‌بادی و بارزانی بۆ ئێواره‌خوانێک داوه‌ت بکات و پێکه‌وه سه‌باره‌ت به پرسه هاوبه‌شه‌کان گفتوگۆ بکه‌ن که بارزانی داوه‌ته‌که‌ی قبووڵ کرد به‌ڵام عه‌بادی ڕه‌تی کرده‌وه.
کۆدی هه‌واڵنێر: 60104
Your Comment