به‌پێی هه‌واڵی کوردپرێس، هه‌دیه یووسف هاوسه‌رۆکی فیدراسیۆنی دیموکراتی باکووری سووریا سه‌باره‌ت به ئه‌گه‌ری هێرشی سه‌ربازیی تورکیا بۆ سه‌ر کانتۆنی عه‌فرین ده‌ڵێت: تورکیا دۆڕاوی ئه‌و شه‌ڕه ده‌بێت.
ناوبراو زیادی کرد: هێرشی تورکیا بۆ سه‌ر عه‌فرین ته‌نها هه‌ڕه‌شه له کورد نییه به‌ڵکوو هه‌ڕه‌شه‌یه دژ به هه‌موو ئه‌و هێزه ناوچه‌یی و نێوده‌وڵه‌تییانه‌ی له ناوچه‌که‌دان.
یووسف جه‌ختی کرده‌وه: فیدراسیۆنی دیموکراتی باکووری سووریا به‌نیاز نییه هیچ هێرشێک بۆ سنووره‌کانی تورکیا بکات به‌ڵام ئه‌گه‌ر ئه‌وانیش چاویان له خاکی ئێمه بێت وه‌ڵاممان ده‌بێت. ئێمه به هه‌موو تفه‌نگه‌کانمانه‌وه مشتیان لێ ده‌گرین و خه‌ڵکه‌که‌مان ده‌پارێزین. ئێمه هێزێکی مه‌شق‌پێکراوین و بڕوامان وایه توانای ئه‌وه‌مان هه‌یه هه‌موو هێرشێک وه‌ڵام بده‌ینه‌وه.
ناوبراو وتیشی: ده‌ستدڕێژیی حکوومه‌تی تورکیا بۆ خاکی سووریا هه‌ڕه‌شه‌یه دژ به هه‌موو هێزه‌کانی ناوچه‌که و به ده‌ستدڕێژی کردنیان بۆ سه‌ر ئه‌لباب، جرابلۆس و ئیدلیب بوون به مه‌ترسی و هه‌ڕه‌شه بۆ سه‌ر هێزه ڕووسییه‌کان. ئێستا هه‌وڵ ده‌درێت قه‌یرانی 7 ساڵه‌ی سووریا کۆتاییی پێ بهێندرێت. حکوومه‌تی تورکیاش به‌نیازه هێرش بکاته سه‌ر عه‌فرین بۆ ئه‌وه‌ی ئاگری شه‌ڕ بڵێسه‌دار بکات و ئه‌و هه‌وڵانه شکست پێ بهێنێت.
یووسف سه‌باره‌ت به ئه‌نجامی شه‌ڕی چاوه‌ڕواننه‌کراوی عه‌فرین گوتی: براوه‌ی ئه‌و شه‌ڕه ئه‌و لایه‌نه ده‌بێت که مه‌شقی زیاتری پێ کراوه. گه‌وره‌ترین دۆڕاوی ئه‌و شه‌ڕه‌ش تورکیا ده‌بێت.
سه‌رچاوه: فورات نیووز
کۆدی هه‌واڵنێر: 60103
Your Comment