«فەتحوڵڵا حوسێنی» ئەندامی نوێنەرایەتی بەڕێوەبەریی خۆسەر لە هەرێمی کوردستان لە گفتوگۆ لەگەڵ کوردپرێسدا ئاماژەی دایە ڕووداوەکانی ئەمدواییەی چوارگۆشەی ئەمنیی دوو شاری حەسەکە و قامیشلۆ لە کوردستانی سووریا و پێکدادان لەنێوان هێزەکانی ئاسایشی کوردستانی سووریا و هێزەکانی بەرگریی نیشتمانیی سەربە حکوومەتی ناوەندیی سووریا و ڕایگەیاند: حکوومەتی ناوەندی ئامانجی ئەوە بوو توانای هێزە کوردییەکان هەڵسەنگێنێت کە نەگەیشتە ئامانجەکەی.
ناوبراو درێژەی دا: ڕووسیا و سووریا دەیانویست گوشار لەسەر بەڕێوەبەرایەتیی خۆسەر دروست بکەن بەڵام سەرکەوتوو نەبوون.
ئەندامەکەی نوێنەرایەتی بەڕێوەبەریی خۆسەر لە هەرێمی کوردستان ئاماژەشی دا بە هاوکات بوونی ڕووداوەکانی حەسەکە و قامیشلۆ لەگەڵ ڕووداوەکانی ناوچەی شەهبا و ناوچە کوردنشینەکانی حەلەب و وتی: حکوومەتی سووریا چەندین مانگە بە بیانووی جیاجیاوە گوشار دەخاتە سە رکەمپی ئاوەرەکانی عەفرین لە ناوچەی شەهبا و هەروەها ناوچە کوردنشینەکانی شاری حەلەب-ی خستۆتە ژێر گوشارەوە و هەوڵەکانی ئاسایشی کوردستان لە حەسەکە و قامیشلۆ وەڵامێک بوو بۆ ئەو پەلامارگەلە.
فەتحوڵڵا حسێنی ئاشکراشی کرد لە ئێستادا بە نێوەندگیریی ڕووسیا ڕووبەڕووبوونەوەکان کۆتاییان پێهاتووە بەڵام ئەم ئارامییە کاتییە و ئەگەری سەرهەڵدانەوەی گرژییەکان لە ئارادایە.
ناوبراو وەبیری هێنایەوە: ئێمە مکووڕین لەسەر ئامانجەکانمان بۆ بەڕێوەبەردنی ناوچەکە و ڕووسیا و سووریاش ئەم ڕاستیە دەزانن.
کۆدی هەواڵنێر: 60113
Your Comment