بەپێی هەواڵی کوردپرێس، ڕۆژی 27ی نۆڤیمبێری 2017، فۆئاد مه‌عسووم سه‌رۆک كۆماری عێراق گه‌یشته‌ شاری كه‌ركووک و له‌گه‌ڵ پارێزگاری شاره‌كه‌ به‌ وه‌كاله‌ت كۆنگره‌یێكی رۆژنامه‌وانیی سازكرد و وتی: كه‌ركووک شاری برایه‌تی و پێكه‌وه‌ ژیانی نێوان نه‌ته‌وه ‌و پێكهاته‌كانه‌ به‌بێ جیاوازی و شاره‌كه‌ نموونه‌یێكی بچووكی عێراقه‌.

سه‌رۆک كۆماری عێراق وتیشی: ده‌مانه‌وێت شاری كه‌ركووک دوور بخرێته‌وه‌ له‌ كێشه‌و ململانێی سیاسییه‌كان، بۆ ئه‌و مه‌به‌سته‌ش له‌گه‌ڵ به‌رپرسانی ئیداره‌ی پارێزگاكه‌ و ده‌زگا ئه‌منییه‌كان و نوێنه‌ری پێكهاته‌كان كۆبوونه‌وه‌ ده‌كه‌م، ئه‌مه‌ جگه‌له‌وه‌ی دانیشتنم له‌گه‌ڵ ئه‌ندامانی ئه‌نجومه‌نی پارێزگای شاره‌كه‌ ده‌بێت، به‌ مه‌به‌ستی درێژه‌دان به‌ كاره‌كانیان و هه‌ڵبژاردنی پارێزگاری نوێ بۆ شاره‌كه‌، چوونكه‌ ده‌بێت ئه‌نجومه‌نه‌كه‌ پارێزگاری نوێ هه‌ڵبژێرێت.

سه‌باره‌ت به ‌رووداوه‌كانی 16ی ئۆكتۆبه‌ری رابردوو، سه‌رۆک كۆماری عێراق رای گه‌یاند: ئومێد ده‌كه‌م ئاسه‌واری رووداوه‌كانی 16ی ئۆكتۆبه‌ری رابردوو له ‌شاره‌كه‌ نه‌مێنێت و به ‌هه‌موو لایێک هه‌وڵ بده‌ین ئه‌و دۆخه‌ی كه‌ هه‌یه‌ تێپه‌ڕێنین و بناغه‌یێكی نوێ بۆ چاره‌سه‌ریی كێشه‌كان دابنێین.

ناوبراو ئه‌وه‌شی ڕوون كرده‌وه‌: هه‌وڵی جددی ده‌ده‌ین بۆ ئه‌وه‌ی هیچ جیاوازییێک له ‌نێوان نه‌ته‌وه‌ و پێكهاته‌كان نه‌مێنێت و چاره‌سه‌ر بۆ هه‌موو كێشه‌كان بدۆزێته‌وه‌.

فۆئاد مەعسووم وتیشی: تا ئه‌و كاته‌ی هه‌ڵبژاردنی ئه‌نجومه‌نی پارێزگاكانی عێراق ده‌كرێت، ئه‌نجومه‌نی پارێزگای كه‌ركووک ده‌مێنێت و هه‌ڵناوه‌شێته‌وه‌.

سەرچاوە: SNN

کۆدی هه‌واڵنێر: 60113