بەپێی هەواڵی کوردپرێس، مەحموود عوسمان لە میانی بەشداری لە پانۆڕامای ئێن ئاڕ تی، سەبارەت بە بڕیاری هەڵوەشاندنەوەی ئەنجامی ریفراندۆم وتی: کەس ناتوانێت ریفراندۆم هەڵبوەشێنێتەوە، بەڵام سڕکردن وەکوو ئەوەی حکوومەتی هەرێم کردی دەبێت.

مەحموود عوسمان راشی گەیاند: بڕیارەکانی دادگای فیدراڵی هەر وەکوو دادگاکانی هەرێم کاریگەریی سیاسییان لە سەرە. پێشی وابوو، بریارەکە زیاتر بۆ ئەوەیە حکوومەتی بەغداد زیاتر فشار بکاتە سەر هەرێمی کوردستان.

مەحمود عوسمان وتیشی: هەرێم و بەغداد لە ساڵانی رابردوو کێشە و ناکۆکیی زۆریان هەبووە، بەڵام پەنایان بۆ دادگای فیدراڵی نەبردووە و هەر حیسابیشیان بۆ نەکردووە، ئەمە مانای وایە کێشەکانیان سیاسییە نەک یاسایی.

ناوبراو ئاماژەی بەوەش کرد: ئەگەر کێشە سیاسییەکان چارەسەر بکرێت، کێشەی یاساییش بوونی نامێنێت.

سەبارەت بە رۆڵی نوێنەرانی کوردیش وتی، سەرۆک کۆمار کاریگەری نییە، بەشێوەیێک هەست بە بوونی ناکرێت و وتیشی، نوێنەرانی کورد لە بەغداد و حکوومەتی هەرێم زۆرجار ئاگایان لە هەنگاوەکانی یەکتری نییە.

هەروەها مەحموود عوسمان باسی لە ئەگەری دەست پێکردنی گفتوگۆکان کرد و وتی تا ئێستا هیچ شتێکی جدی نییە.

لە بارەی رۆڵی وڵاتانیش وتی: ئەمریکییەکان درۆزن و دووڕوون، هەمیشە فشار دەخەنە سەر کورد لە بەرژەوەندی حکوومەتی بەغداد، وڵاتانی تریش هەر بەو شێوەیەن، تاکە وڵات بتوانێت کاریگەری لە سەر بەغداد هەبێت، ئێرانە ئەویش بە لای بەغداد لایداوە و کوردیش پەیوەندییێکی باشی لەگەڵیدا نییە.

کۆدی هه‌واڵنێر: 60113