بەپێی هەواڵی کوردپرێس سەعدوڵڵا نەسیری هونەرمەندی دەنگ خۆشی سنەیی کە ژەنیاری ئامێری دیوانە بانگهێشتی فستیڤاڵی "تالین" کراوە کە بە گەورەترین فستیڤاڵی مۆسیقای هەموو ئەورووپا ناسراوە و نەسیری تاکە نوێنەری ئێران لەو فستیڤاڵە دەبێت.

سەعدوڵا نەسیری ڕۆژی دووشەمە 25ی خەرمانان بەرانبەر بە 16ی ئەیلوولی 2019 لە کۆنفڕانسێکی ڕۆژنامەوانیدا زانیاریی زیاتری لەبارەی فستیڤاڵەکەوە ئاشکرا کرد و ڕایگەیاند: فستیڤاڵی تالین تاکە فستیڤاڵە کە هیچ ئامێرێکی کارەبایی بۆ گەیاندنی دەنگ بەکار ناهێنێت و هونەرمەند بە بێ هیچ گۆڕانێکی زایەڵەی دەنگی خۆی پەخش دەکات و بیسەر بە بێ ئامێرەکان گوێی لە دەنگی هونەرمەند دەبێت.

ئەو هونەرمەندە کوردستانییە زیادی کرد: وەک نوێنەری ئێران بەشداریی فستیڤاڵەکە دەکەم و لەو فستیڤاڵەدا گۆڕانیی کۆنی کولیایی و هەورامان و کەلهوڕ دەچڕم.

سەعدوڵڵا نەسیری دەڵێت لە دوبارەکردنەوە و لاسایی کردنەوەی هونەرمەندانی تر بێزارە و گوتیشی: ستایلی تایبەتی خۆمم هەیە و شێعری زۆرینەی بەرهەمەکانیشم هۆنراوەی خۆمە.

ئەو هونەرمەندە کوردستانییە ڕوونیشی کردەوە: "داڵغەی سەرەکیم ئەوەیە توندوتیژی و شەڕ نەمێنێت و ئاشتی و ئاشتەوایی لە هەموو جیهان جێگیر بکرێت. بۆیە دروشمی "مەولانا و ئاشتی"م بۆ ئەم گەشتە هونەرییەم هەڵبژاردووە.