به‌پێی هه‌واڵی کوردپرێس، ڕۆژی یه‌کشه‌ممه 1ی ئه‌یلوولی 2019 مسته‌فا چاوڕه‌ش ئه‌ندامی سه‌رکردایه‌تیی یه‌کێتیی نیشتیمانیی کوردستان و فه‌رمانده‌ی یه‌کی 70ی پێشمه‌رگه ده‌نگۆکان له‌باره‌ی کشانه‌وه‌ی پێشمه‌رگه له قه‌ره‌هه‌نجیری باکووری پارێزگای جێناکۆکی که‌رکووکی ڕه‌ت کرده‌وه.
ناوبراو زیادی کرد: ده‌نگۆی کشانه‌وه‌ی هێزی پێشمه‌رگه له قه‌ره‌هه‌نجیر به‌پێی داوای ده‌وڵه‌تی عێراق دووره له ڕاستی و فه‌رمانده‌کانی عێراق داواکارییێکی وایان ئاراسته نه‌کردووه.
ئه‌ندامه‌که‌ی سه‌رکردایه‌تیی یه‌کێتی جه‌ختی کرده‌وه: هێزی پێشمه‌رگه و سوپای فیدڕاڵی عێراق له سه‌نگه‌ره‌کانیاندا ئاماده‌ن و به هیچ له‌ونێک کشانه‌وه‌ی هێزه‌کان ڕووی نه‌داوه و ئه‌م بابه‌ته‌ش په‌یوه‌ندی به سه‌رکرده کورده‌کانه‌وه هه‌یه و له‌وباره‌وه بڕیار ده‌ده‌ن.
چاوڕه‌ش له کۆتاییدا ته‌ئکیدی له‌سه‌ر په‌یوه‌ندیی باشی نێوان هێزی پێشمه‌رگه و سوپای عێراق له قه‌ره‌هه‌نجیر کرده‌وه و گوتی: له ئێستادا هیچ جۆره دانووستانێک له نێوان هه‌ردوولا له‌ئارادا نییه.
سه‌رچاوه: هه‌واڵده‌ریی مه‌وازین نیووز
کۆدی هه‌واڵنێر: 60103
Your Comment