کوردپرێس:
عیسا سه‌عدۆ چالاکی مه‌ده‌نیی کوردی سووریا گوتی: "له ناو که‌مپی هۆل که به زۆری خێزانی چه‌کدارانی داعشی تێدایه، ئافره‌تێکی ئێزیدی 20 ساڵه که کاتی خۆی چه‌کدارانی داعش ڕفاندبوویان به‌هۆی لێدان و ئه‌شکه‌نجه‌دانه‌وه گیانی له‌ده‌ست داوه".
ناوبراو گوتیشی: هۆکاری ئه‌و کاره دڕندانه‌یه‌ی ژنانی چه‌کدارانی داعش بۆ ئه‌وه ده‌گه‌ڕێته‌وه که ئافره‌ته ئێزیدییه‌که ویستوویه‌تی خۆی ده‌رباز بکات و بگه‌رێته‌وه بۆ ناو که‌سوکاره‌که‌ی.
ئه‌و ئافره‌ته ئێزیدییه له ساڵی 2014 له‌لایه‌ن چه‌کدارانی ڕێکخراوی تیرۆریستیی داعشه‌وه وه‌ک سه‌دان ئافره‌ت و کچی ئێزیدی‌تر له دوای داگیرکردنی شه‌نگال و ده‌وروبه‌ری ڕفێنرابوو، دواتر بازرگانی پێوه کراوه و له بازاڕه‌کانی مووسڵ و ڕه‌قه کڕین و فرۆشتنی پێوه کراوه به‌ڵام سه‌ره‌ڕای پاککردنه‌وه‌ی دوایین مۆڵگه‌ی ئه‌و ڕێکخراوه تیرۆریستییه و ئازادکردنی ژماره‌یێکی زۆر کچ و ژنی ئێزیدی هێشتا ژماره‌یێکی زۆر له‌و ڕفێنراوانه له ناو که‌مپی هۆلدا ماون و له ترسی ژنانی چه‌کدارانی داعش ناوێرن که‌مپه‌که به‌جێبهێڵن و بگه‌رێنه‌وه بۆ ناو خێزان و که‌سوکاریان.
ئه‌مه‌ش له حاڵێکدایه که شیخمۆس ئه‌حمه‌د به‌رپرسێکی کوردی سووریا باس له‌وه ده‌کات که ژماره‌یێک له ژنانی داعش زۆر مه‌ترسیدارن و ئێمه‌ش به بۆنه‌ی که‌موکورتی ئیمکاناته‌وه ناتوانین ڕێگری له ڕوودانی ئه‌م جۆره ڕووداوانه بکه‌ین.
سه‌رچاوه: میدیاکانی هه‌رێمی کوردستان
کۆدی هه‌واڵنێر: 60103
Your Comment