ئه‌سه‌د سوهرابی له گفتوگۆ له‌گه‌ڵ کوردپرێسدا ڕای­گه‌یاند: کێبه‌رکێی پاراگلایدری وڵات له 14 بۆ 18ی مانگی خه‌رمانان له سایتی فڕینی وه‌یسی قه‌ره‌نی له شاری ڕوانسه‌ر به‌ڕێوه‌ده‌چێت و تا ئێستا 90 پاراگلایدرسوار بۆ به‌شداری له‌و کێبه‌رکێیه‌دا ئاماده‌ییی خۆیان ده‌ربڕیوه.
ناوبراو ئاشکرای کرد: پێشبڕکێی پاراگلایدر له جیهان له دوو به‌شی ئاکروباتیک و دووراییدا به‌ڕێوه ده‌چێت و به‌شی ئاکروباتیکی له ئێران ئه‌نجام نابێت به‌ڵام تا ئێستا زۆر کێبه‌رکێ له به‌شی دووراییدا به‌ڕێوه چووه.
ئه‌و به‌رپرسه هۆکاری هه‌ڵبژێردرانی شاری ڕوانسه‌ر بۆ ئه‌و کێبه‌رکێیه ده‌خاته ڕوو و ده‌ڵێت: دۆخی جوگرافیایی و تۆپۆگرافی ناوچه‌که که دارستان و چیا و ده‌شت ده‌گرێته‌وه بۆ ئه‌و پێشبڕکێیه گونجاوه و به‌رپرسانی پارێزگاکه‌ش به‌رده‌وام پاڵپشتیی خۆیان بۆ به‌ڕێوه بردنی ئه‌و کێبه‌رکێیه ڕاگه‌یاندووه.
سوهرابی ئه‌وه‌شی زیاد کرد: ئێستا 120 فڕۆکه‌وانی پاراگلایدر له پارێزگای کرماشان هه‌ن به‌ڵام له‌م خوله‌ی کێبه‌رکێیه‌که‌دا مه‌رجه‌کان بۆ به‌شداربوون دژوارتر کراوه‌ته‌وه و ته‌نها 8 فڕۆکه‌وان له کرماشانه‌وه به‌شداری کێبه‌رکێیه‌که بوون.
ناوبراو له کۆتاییدا وه‌بیریشی هێنایه‌وه له میدیاکانی وڵاتدا بانگه‌شه‌ی نه‌رێنی بۆ ئه‌و به‌شه وه‌رزشییه کراوه و پێویسته ئه‌وه‌مان له پێش چاو بێت له مێژه‌وه خولیای فڕین له مێشکی مرۆڤدا بووه و ئه‌گه‌ر چوارچێوه و خاڵه‌کانی بێوه‌یی بپارێزرێن ئه‌وا ئه‌و به‌شه وه‌رزشییه یه‌کێکه له خۆشترین وه‌رزشه‌کان.
کۆدی هه‌واڵنێر: 60104
Your Comment