بەپێی هەواڵی کوردپرێس، فەرماندەیی ناوەندیی سوپای ئەمریکا لە راگەیەنراوێکدا بڵاوی کردەوە، بە سێ فڕۆکەی بێ فڕۆکەوان هێرشکراوەتە سەر بنکەی سەربازیی تەنەف کە هێزەکانی ئەمریکا و هاوبەشەکانی تێیدا جێگیر کراون.

ئەوەشی خستوەتەڕوو، ئەو جۆرە هێرشانە مەترسی دەخەنەسەر سەرباز و هاوبەشەکانیان و مایەی قبووڵکردن نین، هەروەها بەردەوامی ئەو هێرشانە مەترسی لەسەر هەوڵەکانی ڕووبەڕووبوونەوەی داعش دروست دەکات.

فەرماندەی ناوەندیی سوپای ئەمریکا دەڵێت، لەلایەن هێزەکانیانەوە دوو درۆن خراونە خوارەوە و ئەوی دیکەیان بەر بنکەکە کەوت، هەروەها بەهۆی هێرشەکە دوو ئەندامی سوپای ئازادی سووریا برینداربوون.

ناوچەی تەنەف دەکەوێتە سەر سنووری سووریا، عێراق و ئوردن لە ساڵی 2015وە ئەمریکا بنکەی سەربازی لەو ناوچەیەدا دامەزراندوە.