کوردپرێس:
ڕۆژی چوارشه‌ممه 31ی ته‌مووزی 2019 سه‌عدی ئه‌حمه‌د پیره به‌رپرسی مه‌كته‌بی په‌یوه‌ندییه گشتییه‌كانی یه‌كێتی له ڕاگه‌یێندراوێکدا بڵاوی کرده‌وه که به یاوه‌ریی هه‌ر یه‌كه له تاریق جامباز و نیعمه‌ت عه‌بدوڵڵا ئه‌ندامانی خوله‌كانی پێشووی په‌رله‌مانی كوردستان سه‌ردانی كونسووڵخانه‌ی توركیای كردووه و سه‌ردانه‌كه به مه‌به‌ستی ده‌ربڕینی هاوخه‌می بووه بۆ ڕووداوه‌كه‌ی 17ی ته‌موزی هۆقه‌باز كه تێیدا دیبلۆماتكارێكی توركیا و دوو كه‌سی‌تر كوژران.
وه‌ک له ڕاگه‌یه‌ندراوه‌كه‌دا هاتووه سه‌عدی پیره پرسه‌نامه‌ی (یه‌كێتیی نیشتیمانیی كوردستان)ی ئاراسته‌ی كه‌سوكاری كوژراوه‌كان كرد و ئیدانه‌ی هه‌موو جۆره كرده‌یێكی توندوتیژی كرد كه كار بكاته سه‌ر ئاڵۆزی و ناسه‌قامگیری ئاسایشی هه‌رێمی كوردستان و ناوچه‌كه و هیواشی خواست ئه‌م ڕووداوه نه‌خوازراوه كار نه‌كاته سه‌ر په‌یوه‌ندییه‌كانی نێوان توركیا و هه‌رێمی كوردستان.
سه‌عدی ئه‌حمه‌د پیره باسی له‌وه کرد که خوازیارین له‌به‌ر ڕۆشناییی یاسا و لێكۆڵینه‌وه‌كانی ده‌زگا و دامه‌زراوه ئه‌منییه‌كانی حكوومه‌تی هه‌رێمی كوردستان به‌دواداچوون و لێكۆڵینه‌وه له‌سه‌ر ڕووداوه‌كه بكرێت.
وه‌ک له ڕاگه‌یه‌ندراوه‌كه‌دا ئاماژه‌ی پێدراوه هاكان كاراچای كونسووڵی گشتیی توركیا سه‌ردانی سه‌عدی ئه‌حمه‌د پیره و شاندی یاوه‌ری به‌رز هه‌ڵسه‌نگاند و ته‌ئكیدی له‌سه‌ر زیاتر توند و تۆڵكردنی په‌یوه‌ندییه‌كانی هه‌ردوولا كرده‌وه و ڕاشیگه‌یاند که ئه‌وان وه‌ک نێرده‌ی دیبلۆماتی وڵاته‌كه‌یان له هه‌رێمی كوردستان به‌رده‌وام ده‌بن له‌سه‌ر كاره‌كانیان بۆ زیاتر به‌ره‌وپێشبردنی په‌یوه‌ندییه‌كانی هه‌ر دوولا و ئاسانكاریی زیاتر بۆ هاووڵاتییانی توركیا و هه‌رێمی كوردستان له هه‌موو بواره جیاوازه‌كاندا.
سه‌رچاوه: ماڵپه‌ڕی ROJ news
کۆدی هه‌واڵنێر: 60103
Your Comment