کوردپرێس:

کوردی سووریا یەک لە سەر چواری خاکی سووریای بەدەستەوەیە و هەر ئەوەش وای کردووە تورکیا لە سەر سنوورەکانی بەڕێژەیێکی زۆر چەک و کەرەستەی سەربازی کۆ بکاتەوە و نێوانی لەگەڵ ئەمریکا ناخۆش بکات و هەوڵی ئەوەش بدات لە دەوڵەتی ناوەندیی سووریا نزیک ببێتەوە.

لەم نێوانەدا مەترسیی هێرش­کردنی تورکیا بۆ سەر ناوچەی ژێر دەسەڵاتی کوردی سووریا لە ئارادایە و هەر ئەوە بۆتە هۆی ناسەقامگیریی ناوچەکە ئەگەرچی ئێستا تا ڕادەیێک گەشتۆتە ئارامی و سەقامگیری. تورکیا دەڵێت کوردەکانی سووریا لە پەکەکەوە نزیکن و تورکیاش و ئەورووپاش و ئەمریکا پەکەکە بە گرووپی تیرۆریستی دەزانن و لە ماوەی چەند ساڵی ڕابردوودا شەڕی چەکدارانەی دژی دەوڵەتی تورکیا کردووە.

پەیمانگای کارنگی لە ڕاپۆرتێکدا لەبارەی مەترسیی تێکچوونی ئاسایشی باکووری سووریا هۆشداری داوە و چەند پێشنیازێکیشی ئاراستە کردووە. ئەو پەیمانگایە بڕوای وایە بە لێکگەیشتنی تورکیا و پارتی یەکێتیی دیموکراتی کوردستانی سووریا و هەروەها داننان بە مافی کورد و داماڵی چەکی قورس لە کوردەکانی سووریا ئاسایش و ئارامی دەگەڕێتەوە بۆ باکووری سووریا.

پەیمانگای کارنگی پێشنیازێکیشی ئاراستەی ئەمریکا کردووە و بەو پێیە داوای کردووە پڕۆسەی کشانەوەی هێزە ئەمریکییەکان لە سووریا بوەستێت و دەست بکات بە کۆکردنەوەی متمانە لای کوردیش و تورکیاش و لە ئەنجامدا هەوڵ بدات لێکگەیشتنێک لە نێوان تورکیا و پارتی دیموکراتی کوردستانی سووریا PYD دروست بکات.

بەپێی ڕاپۆرتەکەی پەیمانگای کارنگی، پێویستە ئەمریکا بکاتە کارێک کە کوردی سووریا مافەکانیان پارێزراو بێت چوونکە شان بە شانی ئەو وڵاتە شەڕی داعشیان کردووە. هەروەهاش ئەرکی ئەمریکایە هەوڵ بدات پێوەندیی نێوان کوردی سووریا و دەوڵەتی تورکیا باش بکات.

پەیمانگای کارنگی بڕواشی وایە چاک­بوونەوەی پێوەندیی نێوان کوردی سووریا و دەوڵەتی تورکیا لە ڕێگای ڕێککەوتنی نێوان تورکیا و PYD دەستەبەر دەبێت و ئەو ڕێککەوتنە زەمینەخۆشکەر دەبێت بۆ جێبەجێکرانی پێبەندبوونی ئەمریکا بەرانبەر بە تورکیا. یەک لەو پێبەندبوونانەش سەندنەوەی چەکە قورسەکانە لە کوردی سووریا. هەروەهاش ئەمریکا دەبێت ناوچەی ئارام لە باکووری سووریا دابمەزرێنێت و بەو شێوەیە کوردەکان لە سنووری تورکیا دوور بخاتەوە.

ئەو پەیمانگایە لە کۆتاییدا ئەوەشی گوتووە کە بۆ ئەو مەبەستانەی باس کران پێویستە پەیەدە بەڵێن بدات پێوەندییەکانی لەگەڵ پەکەکە بپچڕێنێت.