بەپێی هەواڵی کوردپرێس محەمەد سەعید کەریمیان بەڕێوەبەری گشتیی خوێن گواستنەوە لە پارێزگای کوردستان ڕایگەیاند نوێنەرانی وەزارەتی تەندروستیی وڵاتی نەمسا لە ڕێگای کۆمپانیای "ئۆکتافارما"وە کوالێتیی خوێنی ئەو سەنتەرەیان پەسەند کردووە و بڕیارە ئاڵوگۆڕی دەرمان و خوێن لەگەڵ وڵاتی نەمسا دەست پێبکات.

بەڕێوەبەری دایرەی خوێن­گواستنەوە لە پارێزگای کوردستان گوتیشی بڕیاریان داوە پلازمای زیادی کە لە نەخۆشخانەکان دەمێنێتەوە کۆ بکەنەوە و بۆ بەرهەمهێنانی یان هاوردەکردنی دەرمان لە وڵاتی نەمساوە بەکاری بهێنن.

کەریمیان گوتیشی مۆڵەتی هەناردەکردنی خوێنیان بۆ وڵاتی نەمسا وەرگرتووە.

شایانی باسە شاندێکی چاودێر لە وەزارەتی تەندروستیی وڵاتی نەمساوە ڕۆژانی یەکشەمە و دووشەمە 23 و 24ی پووشپەڕ سەردانی پارێزگای کوردستانیان کردبوو و لە میانی سەردانەکەیاندا دایرەی خوێن­گواستنەوەی کوردستانیان بەسەر کردبووەوە.