کوردپرێس:

کۆنسوڵخانەی گشتی فەرەنسا لە هەولێر لە راگەیێندراوێکدا وێڕای پیرۆزبایی لە سەرۆکوەزیرانی هەرێمی کوردستان و کابینە نوێیەکەی دەڵێت، متمانەمان بە توانای ئەم کابینە نوێیە هەیە کە بەزووترین کات وەڵامی چاوەڕوانییەکانی خەڵکی هەرێمی کوردستان و عێراق لەبارەی هەلی کار، ئاسایش و خزمەتگوزاری گشتی بداتەوە.

کۆنسوڵخانەی گشتیی فەرەنسا ئاماژەی بەوەش کردووە "دەزانین ئەم کابینە نوێیە پێداگری دەکات بە هێشتنەوەی ئاستی بەرزی گفتوگۆ لەگەڵ حکوومەتی فیدراڵ و پتەوکردنی زیاتری یەکگرتووییی هەرێمی کورستان، ئەمانەش مەرجن بۆ چارەسەرکردنی کێشە سیاسییەکان لەگەڵ بەغدا".

هەر لە پەیامێکی جیادا کۆنسووڵخانەی ئەمریکاش ڕایگەیاند پشتیوانیی کابینەی نوێی حکوومەتی هەرێمی کوردستان دەکەن و هیوای ئەوەش دەخوازن ئەو کابینەیە کار بکات بۆ چارەکردنی کێشەکانی نێوان بەغدا و هەولێر.

ئەمە لەکاتێکدایە ڕۆژی چوارشەمە 10ی تەمووزی 2019 پەرلەمانی کوردستان متمانەی بە سەرۆکوەزیران، جێگری سەرۆکوەزیران و وەزیرەکانی کابینەی نوێی حکوومەتی هەرێمی کوردستان دا.

مەسروور بارزانی بە دەنگی 88 پەرلەمانتار بووە سەرۆکوەزیرانی هەرێمی کوردستان، هەروەها قوباد تاڵەبانیش بە دەنگی 73 پەرلەمانتار بووە جێگری سەرۆکوەزیرانی هەرێمی کوردستان.