کوردپرێس:

دروست كردنی فڕۆكه‌خانه‌ی نێوده‌وڵه‌تیی داكسینگ له‌ په‌كین كۆتایی هاتووه‌. ئه‌م فڕۆكه‌خانه‌یه‌ ده‌بێته‌ گه‌وره‌ترین فڕۆكه‌خانه‌ی جیهان له‌ ڕووی ژماره‌ی گه‌شتیارانه‌وه‌ كه‌ له‌ داهاتوودا ده‌توانێت ساڵانه‌ بگاته 100 ملیۆن گه‌شتیار.

فڕۆكه‌خانه‌كه‌ له‌سه‌ر ڕووبه‌ری 1.4 ملیۆن مه‌تر چوارگۆشه‌ دروست كراوه‌ و تێرمیناڵه‌كه‌ی هێنده‌ی 25 یاریگای تۆپی پێیه‌. دروست كردن و پشكنینی فڕۆكه‌خانه‌كه‌ كه‌ ده‌كه‌وێته‌ 46 كم له‌ باشووری شاری په‌كینه‌وه‌ ڕۆژی یه‌كشه‌ممه‌ كۆتایی هات.

له‌ ئێستادا ئاماده‌كاری ده‌كرێت بۆ ئه‌وه‌ی به‌ ته‌واوی بكرێته‌وه‌ و چاوه‌ڕوان ده‌كرێت له‌ كۆتاییی ئه‌یلوولی داهاتوودا ده‌رگاكانی به‌ ڕووی گه‌شتیاراندا بكاته‌وه‌.

ئه‌و پڕۆژه‌ زه‌به‌لاحه‌ نزیكه‌ی 60 ملیار دۆلاری تێچووه‌.

ئه‌م ناوه‌نده‌ قه‌ره‌باڵغی‌ ناو فڕۆكه‌خانه‌ی نێوده‌وڵه‌تیی په‌كین به‌ ڕێژه‌یێكی به‌رچاو كه‌م ده‌كاته‌وه‌ و ڕه‌نگه‌ له‌ كۆتاییی ساڵی 2020یشدا هاوكاری چین بێت بۆ ئه‌وه‌ی ببێته‌ گه‌وره‌ترین بازاڕی فڕۆكه‌وانیی مه‌ده‌نی له‌ جیهاندا.

تا ساڵی 2025 فڕۆكه‌خانه‌كه‌ ده‌توانێت ساڵانه‌ پێشوازی له‌ 72 ملیۆن گه‌شتیار بكات و 620 هه‌زار گه‌شتی فڕۆكه‌وانی ئه‌نجام بدات، تا ساڵی 2040یش توانای پێشوازی له‌ گه‌شتیاران ساڵانه‌ به‌رز ده‌بێته‌وه‌ بۆ 100 ملیۆن گه‌شتیار و 880 هه‌زار گه‌شتی فڕۆكه‌وانی ئه‌نجام ده‌دات. به‌مه‌ش ڕه‌نگه‌ پێش قه‌ره‌باڵغترین فڕۆكه‌خانه‌ی جیهان بكه‌وێته‌وه‌ كه‌ ئه‌تلانتایه‌ له‌ ئه‌مریكا.

کۆدی هه‌واڵنێر: 60103