بەپێی هەواڵی نێچیرڤان بارزانی سەرۆکی هەرێمی کوردستان لە پەیامەکەیدا پیرۆزبایی جەژنی نەورۆزی کردووە، هاوکات ئاماژەی بەوە کردووە کە نەورۆز ببێتە هاندەری نوێبوونەوەی بیر و رامانی هەموو لایەک و "ببێتە دەستپێک و سەرەتایەکی تازە بۆ ژیان و پەیوەندییەکانمان، بۆ ئاشته‌وايى و ئومێد و گه‌شبينى و بۆ چۆنيه‌تيى مامه‌ڵه‌کردنمان له‌گه‌ڵ پێشهات و ڕووداوه‌کانى ده‌وروبه‌رماندا".
نێچیرڤان بارزانی، سەرۆکی هەرێمی کوردستان لە پەیامەکەیدا ئەوەی خستووەتەڕوو، "له‌سه‌ر ئاستى گشتيش، له هه‌موو کاتێک زياتر ئه‌رکى هێز و لايه‌نه سياسييه‌کان و پێکهاته‌کانى کوردستانه به‌گشتى، يه‌کڕيز و ته‌با بن و به هاوبه‌شى پێکه‌وه کار بکه‌ن بۆ ئه‌وه‌ى هه‌موومان به يه‌کگرتوويى به‌ره‌وڕووى سه‌ختى و ته‌حه‌دييه‌کان ببينه‌وه و سه‌رکه‌وتووانه تێيانپه‌ڕێنين".
سەرۆکی هەرێمی کوردستان دەشڵێت، "پاراستنى ماف و ده‌ستکه‌وته‌کان و قه‌واره‌ى ده‌ستوورى و سياسى و فيدراڵیی هه‌رێمى کوردستان، وه‌کوو چۆن به‌رهه‌مى تێکۆشانى هه‌موو کوردستانييانه، ئاواش به‌رپرسياريه‌تيى هاوبه‌شى هه‌موومانه بۆ ئه‌وه‌ى پێکه‌وه به‌ره‌و داهاتوويه‌کى باشتر و ڕووناکترى دڵنيا هه‌نگاو بنێين و سه‌رکه‌وين".
نێچیرڤان بارزانی جەختی لەوە کردووەتەوە که هه‌رێمى کوردستان وه‌کوو هه‌ميشه ئاماده‌يه هه‌موو کێشه و ناکۆکييه‌کانى له‌گه‌ڵ حکوومه‌تى فيدراڵیى عێراق به گفتوگۆ و له‌سه‌ر بنه‌ماى ده‌ستوور چاره‌سه‌ر بکات. وه‌کوو هه‌ميشه فاکته‌رى چاره‌سه‌رى ده‌بين بۆ کێشه‌کانى عێراق و له‌پێناو ئارامى و سه‌قامگيريى وڵاتدا، يارمه‌تيده‌ر و هاوکار ده‌بين".
دەقی پەیامەکەی نێچیرڤان بارزانی، سەرۆکی هەرێمی کوردستان:
جه‌ژنى نه‌ورۆز و سه‌رى ساڵى تازه‌ى کوردى، زۆر به گه‌رمى و له دڵه‌وه له خانه‌واده‌ى سه‌ربه‌رزى شه‌هيدان، له گه‌لى کورد و ته‌واوى گه‌ل و پێکهاته و پێشمه‌رگه قاره‌مانه‌کانى کوردستان پيرۆز ده‌که‌م. هيوادارم هه‌مووان پێکه‌وه له‌گه‌ڵ خۆشه‌ويستان و ئازيزانيان جه‌ژنێکى خۆش له ئارامى و سه‌قامگيريدا به‌سه‌ر به‌رن.
داوا له هاووڵاتييانى ئازيز ده‌که‌م له کاتى چوونه‌ده‌ره‌وه و گه‌شت و سه‌يرانى ناو سروشتى جوانى کوردستان، تا ئه‌وپه‌ڕى، پابه‌ندى ڕاگرتنى پاکوخاوێنى و پاراستنى ژينگه‌ى دڵڕفێن و به‌هاريى وڵات بن. ئاگادارى خۆيان بن و ڕه‌چاوى خۆپارێزى و ڕێنماييى ته‌ندروستى بکه‌ن.
نه‌ورۆز که جه‌ژنی ئازادی و گيانى به‌ره‌نگاربوونه‌وه و بڕوابه‌خۆبوونه، ساڵى تازه و نوێبوونه‌وه‌يه، له‌سه‌ر ئاستى تاک و که‌سى، با هانده‌رى نوێبوونه‌وه‌ى بير و ڕامانى هه‌موومان بێت و بيکه‌ينه ده‌سپێک و سه‌ره‌تايه‌کى تازه بۆ ژيان و په‌يوه‌ندييه‌کانمان، بۆ ئاشته‌وايى و ئومێد و گه‌شبينى و بۆ چۆنيه‌تيى مامه‌ڵه‌کردنمان له‌گه‌ڵ پێشهات و ڕووداوه‌کانى ده‌وروبه‌رماندا.
له‌سه‌ر ئاستى گشتيش، له هه‌موو کاتێک زياتر ئه‌رکى هێز و لايه‌نه سياسييه‌کان و پێکهاته‌کانى کوردستانه به‌گشتى، يه‌کڕيز و ته‌با بن و به هاوبه‌شى پێکه‌وه کار بکه‌ن بۆ ئه‌وه‌ى هه‌موومان به يه‌کگرتوويى به‌ره‌وڕووى سه‌ختى و ته‌حه‌دييه‌کان ببينه‌وه و سه‌رکه‌وتووانه تێيانپه‌ڕێنين.
پاراستنى ماف و ده‌ستکه‌وته‌کان و قه‌واره‌ى ده‌ستوورى و سياسى و فيدراليى هه‌رێمى کوردستان، وه‌ک چۆن به‌رهه‌مى تێکۆشانى هه‌موو کوردستانييانه، ئاواش به‌رپرسياريه‌تيى هاوبه‌شى هه‌موومانه بۆ ئه‌وه‌ى پێکه‌وه به‌ره‌و داهاتوويه‌کى باشتر و ڕووناکترى دڵنيا هه‌نگاو بنێين و سه‌رکه‌وين.
له‌م بۆنه‌يه‌دا دووپاتى ده‌که‌ينه‌وه که هه‌رێمى کوردستان وه‌ک هه‌ميشه ئاماده‌يه هه‌موو کێشه و ناکۆکييه‌کانى له‌گه‌ڵ حکوومه‌تى فيدرالى عيراق به گفتوگۆ و له‌سه‌ر بنه‌ماى ده‌ستوور چاره‌سه‌ر بکات. وه‌ک هه‌ميشه فاکته‌رى چاره‌سه‌رى ده‌بين بۆ کێشه‌کانى عيراق و له‌پێناو ئارامى و سه‌قامگيريى وڵاتدا، يارمه‌تيده‌ر و هاوکار ده‌بين.
هه‌ر لێره‌وه، له کوردستانى لێبورده‌يى، يه‌کترقبووڵکردن و پێکه‌وه‌ژيانه‌وه، ڕێز و سڵاوى نه‌ورۆزى و بۆندارانه‌ى به‌هارى، بۆ گه‌لانى عيراق و ناوچه‌که، جيهان و دۆستانى کوردستان له هه‌ر کوێيه‌ک بن، هه‌روه‌ها بۆ UN ده‌نێرين که جه‌ژنى نه‌ورۆزى کرده ڕۆژێکى نێوده‌وڵه‌تى و له‌گه‌ڵ هه‌مووان له‌پێناو ئارامى و سه‌قامگیری و ئاشتيدا کار ده‌که‌ين.
نه‌ورۆز له هه‌مووان پيرۆز بێت، هه‌موو ساڵيک به خۆشى.
نێچيرڤان بارزانى
سه‌رۆکى هه‌رێمى کوردستان
20ى ئازارى 2022
Your Comment