به‌پێی هه‌واڵی کوردپرێس، ئه‌مڕۆ یه‌کشه‌ممه 9ی حوزه‌یرانی 2019/ 19ی جۆزه‌ردانی 1398 سه‌رهه‌نگ مه‌جید موحێبعه‌لی فه‌رمانده‌ی ئینتیزامیی شاری بۆکان ڕای‌گه‌یاند: له هه‌ڵمه‌تی هاوبه‌شی پۆلیسی به‌ره‌نگاربوونه‌وه‌ی ماده‌ی هۆشبه‌ری ئازه‌ربایجانی ڕۆژئاوا و بۆکان 10 کیلۆ و 750 گرام ماده‌ی هۆشبه‌ری هێرۆئین له ئۆتۆمبێلێکی جۆری 206 دۆزرایه‌وه و ده‌ستی به سه‌ردا گیرا.
ناوبراو وتیشی: به له‌به‌رچاوگرتنی پشووه‌کانی دوایین ڕۆژانی هه‌فته و جێژنی ڕه‌مه‌زان سه‌وداگه‌رانی مه‌رگ و قاچاخچیانی ماده‌ی هۆشبه‌ر هه‌وڵیان دا ئه‌م ده‌رفه‌ته بۆ دابه‌ش‌کردنی ماده‌ی هۆشبه‌ر له شاره ناوه‌ندییه‌کانی ئێران به‌کار بهێنن که پێش له ئه‌نجامدانی هه‌ر کارێک له‌لایه‌ن پۆلیسه‌وه ده‌ستگیر کران.
سه‌رهه‌نگ موحێبعه‌لی ڕاشی‌گه‌یاند: هاوپه‌یوه‌ند به بابه‌ته‌که یه‌ک که‌س ده‌ستگیر و ڕاده‌ستی ده‌زگای داد کرا.
هه‌روه‌ها جێگری کۆمه‌ڵایه‌تیی ئینیزامیی ئازه‌ربایجانی ڕۆژئاوا باسی له‌وه کرد که له کاتی پشکنینی ئۆتۆمبێلێکدا شه‌ش کیلۆگرام ماده‌ی هۆشبه‌ری جۆری تریاکیان دۆزیوه‌ته‌وه که له‌مباره‌شه‌وه دوو که‌س ده‌ستگیر کران.
کۆدی هه‌واڵنێر: 60103
Your Comment