به‌پێی هه‌واڵی کوردپرێس، مێهه‌ت یاڤووز هه‌واڵنێری ڕۆژنامه‌ی ئایدینلیکی تورکیا له یادداشتێکدا ئاماژه به دیداری 8ی مه‌ی 2019ی به‌شار ئه‌سه‌د سه‌رۆک کۆماری سووریا له‌گه‌ڵ هه‌واڵنێران ده‌کات که به بێ ڕووماڵ‌کردنی هه‌واڵ و به شێوه‌یێکی تایبه‌ت له کۆشکی سه‌رۆکایه‌تیی کۆماری سووریادا به‌ڕێوه‌چوو و ده‌نووسێت: له‌م کۆبوونه‌وه‌یه‌دا له‌باره‌ی گۆڕانکارییه هه‌رێمی و ده‌ولییه‌کان پرسیار له به‌شار ئه‌سه‌د کرا و ناوبراویش وه‌ڵامی پرسیاری هه‌واڵنێرانی دایه‌وه. ئێمه‌ش به بۆنه‌ی چه‌ندین دۆسته‌وه له‌باره‌ی تورکیاوه پرسیارمان له به‌شار ئه‌سه‌د کرد که ناوبراو وه‌ڵامی پرسیاره‌کانی ئێمه‌ی دایه‌وه و ڕای‌گه‌یاند: تورکیا وڵاتێکی زۆر گرنگه و ئێمه‌ش ئاماده‌ین هاوکاری له‌گه‌ڵ تورکیا بکه‌ین. ئه‌گه‌ر به‌رژه‌وه‌ندییه‌کانی سووریا له‌خۆ بگرێته‌وه و کارتێکه‌رییێکی له‌سه‌ر سه‌روه‌ریی سووریا نه‌بێت ئه‌وا ئاماده‌ین له‌گه‌ڵ ئه‌ردۆغانیش دیدار ئه‌نجام بده‌ین. دیدار له‌گه‌ڵ لایه‌نه تورکه‌کان ته‌نها به ناوبژیڤانیی ئێران و ڕووسیاوه ئه‌نجام ده‌بێت. هێزه‌کانی تورکیا و سووریا له هه‌ندێک ناوچه دیدار و دانووستانیان ئه‌نجام داوه.
ناوبراو له درێژه‌ی لێدوانه‌کانیدا جه‌ختی کرده‌وه: گرینگترین دیداری نێوان هێزه‌کانی تورکیا و سووریا له ناوچه‌ی سنووریی "کسب" (سنووری یایلاغی هاتای- سنووری کسبی لازقیه) ئه‌نجام درا. هه‌روه‌ها لیژنه‌ی سووریا له‌گه‌ڵ هاکان فیدان سه‌رۆکی ده‌زگای میت له تاران دیدار و گفتوگۆی کرد. هێزه‌کانی تورکیا له‌سه‌ر ئه‌و گۆڕانکارییانه که له سووریادا ڕوو ده‌دات له چاو سیاسه‌توانانی تورک زانیارییێکی زیاتریان هه‌یه. ڕاجیاوازییێکی زۆر له ده‌وڵه‌تی ئه‌ردۆغان له‌باره‌ی پرسی سووریاوه هه‌یه.
کۆدی هه‌واڵنێر: 60103
Your Comment