به‌پێی هه‌واڵی کوردپرێس، خولووسی ئاکار وه‌زیری به‌رگریی تورکیا باسی له ئۆپه‌راسیۆنی ئاسمانیی سوپای تورکیا له‌ژێر ناوی "چنگال" بۆ سه‌ر باره‌گای PKK له باکووری عێراق کرد و گوتی: هێزی ئاسمانیی سوپای تورکیا هه‌فته‌ی ڕابردوو هاوکات له‌گه‌ڵ ئۆپه‌راسیۆنی "چنگال" ئۆپه‌راسیۆنێکی گه‌وره‌ی دیکه‌ی ده‌ست پێکرد که گورزێکی کوشنده‌مان له PKK وه‌شاندووه. ده‌ستخۆشی له سه‌رجه‌م فڕۆکه‌وانان و فه‌رمانده‌کانی سوپای تورکیا ده‌که‌م که له‌م ئۆپه‌راسیۆنه‌دا به‌شدارییان کردووه و پیرۆزباییان لێده‌که‌م.
ناوبراو له درێژه‌ی لێدوانه‌کانیدا گوتیشی: ئۆپه‌راسیۆنی به‌ره‌نگاربوونه‌وه‌ی تیرۆریزمی تورکیا جگه له ڕۆژهه‌ڵات و باشووری ڕۆژهه‌ڵاتی ئه‌و وڵاته له باکووری عێراق و سووریاش به‌رده‌وامه. هیچ که‌س هه‌وڵ نه‌دات ئیراده‌ی ئێمه له‌سه‌ر پاراستنی مافی یاساییمان له چوارچێوه‌ی ڕێککه‌وتننامه دوولایه‌نه و نێوده‌وڵه‌تییه‌کان تاقی بکاته‌وه. ئێمه ده‌مانه‌وێت کێشه‌کان له ڕێگای دانووستانه‌وه چاره‌سه‌ر بکرێت. نابێت که‌س هه‌لقۆستنه‌وه له نیازپاکیی ئێمه بکات و کاری هانده‌رانه ئه‌نجام بدات. هه‌مووان به باشی ده‌زانن که هیچ کارێکی هانده‌رانه بێ‌وه‌ڵام نامێنێته‌وه.
سه‌رچاوه: هه‌واڵده‌ریی ئه‌نادۆڵو
کۆدی هه‌واڵنێر: 60103
Your Comment