به‌پێی هه‌واڵی کوردپرێس، گۆڤاری فارن پاڵسی له زاری به‌رپرسانی باڵای ده‌وڵه‌تی ئه‌مریکاوه باسی له‌وه کردووه که واشنتۆن ده‌یه‌وێت به‌پێی ئه‌وله‌وییه‌تی کاریی وه‌زاره‌تی ده‌ره‌وه‌ی وڵاته‌که‌ی ژماره‌ی دیپلۆماتکارانی له هه‌رێمی کوردستان و به‌غدا پێته‌ختی عێراق که‌م بکاته‌وه.
به‌رپرسێکی وه‌زاره‌تی ده‌ره‌وه‌ی ئه‌مریکا به‌و گۆڤاره‌ی ڕاگه‌یاندووه که چین 4 بۆ 5 هێنده‌ی ئه‌مریکا دیپلۆماتکاری له ئه‌فریقا جێگیر کردوووه و هه‌وڵ بۆ گه‌شه‌ی په‌یوه‌ندییه ئابووری و بازرگانییه‌کان ده‌دات که‌واته ئه‌مریکا ناتوانێت ته‌نها ته‌رکیز له‌سه‌ر عێراق یان ئه‌فغانستان بکات.
دوو دیپلۆماتکاری ئه‌مریکا به‌و گۆڤاره‌یان ڕاگه‌یاندووه که ئه‌مساڵ ئه‌مریکا 20 بۆ 30 دیپلۆماتکار له هه‌ولێر و به‌غدا لاده‌بات و له ساڵی 2020یشدا 30 بۆ 50 دیپلۆماتکار له کۆنسووڵخانه‌کانی ئه‌مریکا له هه‌ولێر و به‌غدا لا ده‌بات.
مانگی فێبریوێری ڕۆژنامه‌ی نیۆیۆرک تایمز له ڕاپۆرتێکدا باسی له‌وه کرد که ئه‌مریکا 16 هه‌زار فه‌رمانبه‌ری له باڵیۆزخانه‌ی ئه‌مریکا له به‌غدا هه‌یه که 2 هه‌زار که‌سیان دیپلۆماتکارن.
وته‌بێژی وه‌زاره‌تی ده‌ره‌وه‌ی ئه‌مریکا له‌باره‌ی ئه‌و بابه‌ته به فارن پاڵسی وتووه: ئه‌مریکا عێراق به‌جێ ناهێڵێت و باڵیۆزخانه‌ی ئه‌و وڵاته له به‌غدا و هه‌ولێر درێژه به چالاکییه‌کانی ده‌دات.
ئه‌مه‌ش له حاڵێکدایه که ئه‌مریکا ده‌یه‌وێت گه‌وره‌ترین باڵیۆزخانه‌ی خۆی له جیهان له هه‌ولێر پێته‌ختی هه‌رێمی کوردستان بکاته‌وه.
کۆدی هه‌واڵنێر: 60103
Your Comment