کوردپرێس:

بەپێی هەواڵی ماڵپەڕی فەرمیی پارتی دیموکراتی کوردستان ڕۆژی پێنجشەممە 28ـی 3ـی 2019 لە سەلاحەددین مەسعوود بارزانی پێشوازیی لە زانای كورد و خاوەنی مەدالیای فیڵدز، دكتۆر كۆچەر بیركار كرد.

لە دیدارەكەدا مەسعوود بارزانی سوپاسی دكتۆر كۆچەر بیركاری كرد و ڕایگەیاند كە كۆچەر بیركار جێگەی شانازییە بۆ هەموو تاكێكی كورد و هیوای خواست كە نموونەی وەك دكتۆر كۆچەر لەناو لاوانی كورد زیاتر بن. هەروەها ئەوەیشی خستەڕوو كە دەستكەوتەكانی دكتۆر كۆچەر لە بواری زانستدا سەلمێنەری ئەوەیە كە ئەگەر لاوانی كورد دەرفەتیان بۆ بڕەخسێ وەك گەنجانی دیكەی جیهان دەتوانن لە بواری زانست و داهێناندا سەركەوتن بەدەست بهێنن. سەرۆك بارزانی پشتیوانی خۆی بۆ هەوڵەكانی ئەو زانایەی گەلی كوردستان ڕاگەیاند لە یارمەتیدانی ئاستی زانستی و پێگەیاندنی قوتابیانی كوردستان و هیوای سەركەوتن و تەمەندرێژیی بۆ خواست.

هەر لەو دیدارەدا دكتۆر كۆچەر بیركار وێڕای سوپاسگوزاری بۆ پشتگیرییەكانی بارزانی، باسی لە كۆمەڵێك پڕۆژە و بیرۆكەی خۆی كرد كە بە نیازە بە هاوكاری لەگەڵ زانكۆی سەلاحەددین بۆ یارمەتیدانی قوتابیانی كوردستان پێشكەشی بكات.

دیدارەکەش لەکاتێکدا بەڕێوە چوو کە ڕۆژی چوارشەمە 27ی ئازاری 2019 رێوڕەسمی خه‌ڵاتی رێزلێنان و به‌خشینی دكتۆراى فه‌خری به‌ زانا و بیرمه‌ندی كورد پرۆفیسۆر كۆچه‌ر بیركار به‌ ئاماده‌بوونی نێچیرڤان بارزانی سه‌رۆكی حكوومه‌تی هه‌رێمی كوردستان و قوباد تاڵەبانی، جێگری سه‌رۆكی حكوومه‌ت و ڤالا فەرید سەرۆکی پەرلەمانی کوردستان و ژماره‌یێک له‌ به‌رپرسانی حكوومی و و حزبی و سەرۆکی زانکۆی سەڵاحەدین و نوێنەر و کۆنسووڵی وڵاتان و ژماره‌یێک كه‌سایه‌تیی جۆراوجۆر به‌رێوه ‌چوو.

کۆدی هەواڵنێر: 60101