به‌پێی هه‌واڵی کوردپرێس، حوسێن كورۆ قائیدی به‌رپرسی نووسینگه‌ی ڕزگاركردنی ڕفێندراون که سه‌ر به نووسینگه‌ی سه‌رۆکوه‌زیرانی هه‌رێمی کوردستانه ڕای‌گه‌یاند: سه‌ره‌ڕای کۆتایی هاتنی داعش به‌ڵام هێشتا چاره‌نووسی هه‌زاران کوردی ئێزدی دیلی ده‌ستی داعش نادیاره و به‌و بۆنه‌وه حکوومه‌تی هه‌رێم لیژنه‌یێکی پێکهێناوه بۆ ئه‌وه‌ی بچنه باغۆز و که‌مپی ئه‌لهۆل له حه‌سه‌که به مه‌به‌ستی دۆزینه‌وه‌ی ئه‌و کورده ئێزدییانه‌ی له ژیاندا ماون.
پێشتر به‌ڕێوه‌به‌ری گشتیی کاروباری ئێزدییان له وه‌زاره‌تی ئه‌وقاف و کاروباری ئایینیی هه‌رێمی کوردستان ڕای‌گه‌یاندبوو: له کۆی شه‌ش هه‌زار و 417 کوردی ئێزدی ڕفێندراوی ده‌ستی داعش ته‌نیا سێ هه‌زار و 371 کوردی ئێزدی ڕزگاریان بوووه و 3 هه‌زار و 46 که‌سیش چاره‌نووسیان دیار نییه.
ئه‌مه‌ش له حاڵێکدایه له چه‌ند ڕۆژی ڕابردوودا داعش دوامۆڵگه‌ی خۆی له ڕووی جوگرافییه‌وه له باغۆزی سه‌ر به پارێزگای دێره‌زووری ڕۆژهه‌ڵاتی سووریا له ده‌ست دا و هیچ شوێنێكیان به ده‌سته‌وه نه‌ماوه به‌ڵام تا ئێستا سه‌دان ڕفێندراوی ئێزدی كه له‌لایه‌ن ئه‌و ڕێكخراوه‌وه ڕفێندرابوون چاره‌نووسیان به نادیاری ماوه‌ته‌وه و كه‌سوكاره‌كانیان داوا ده‌كه‌ن لایه‌نه په‌یوه‌ندیداره‌كان هه‌وڵه‌كانیان بۆ دۆزینه‌وه‌ی كه‌سه نزیكه‌كانیان چڕ بكه‌نه‌وه.
له ماوه‌ی به‌ڕێوه‌چوونی ئۆپه‌راسیۆنی باغۆزدا زیاتر له 200 ژن و منداڵی کوردی ئێزدی ڕزگار کران و گواسترانه‌وه شه‌نگال یان که‌مپه‌کانی هه‌رێمی کوردستان.
کۆدی هه‌واڵنێر: 60103
Your Comment