کوردپرێس:

بەگوێرەی راگەیێندراوی ئەنجوومەنی ئاسایشی هەرێمی کوردستان، ئەمڕۆ دووشەممە 21-1-2019 مەسروور بارزانی پێشوازی لە جەنەراڵ ئۆستن رێنفورت، بەرپرسی ژووری ئۆپەراسیۆنی هاوپەیمانان لە بەغدا و شاندی یاوەری کردووە.

مەسروور بارزانی وێڕای جه‌ختكردنه‌وه‌ له هاوکاری زیاتری هێزی پێشمەرگە بۆ رێگریكردن له‌ جموجۆڵ و رووبه‌ڕووبوونه‌وه‌ی هه‌ڕه‌شه‌كانی تیرۆر لە ناوچەکانی دەرەوەی ئیدارەی حکومەتی هەرێمی کوردستان، "بە پێویستیزانی بە هاوکاریی هەمەلایەنە هەرچی زووترە زەمینەی لەبار بۆ ئاساییکردنەوەی دۆخەکە بڕەخسێت و بە چارەسەریی کێشە سیاسی و ئیداری و دەستوورییەکان، هۆکارەکانی سەرهەڵدانەوەی تووندووتیژی بنەبڕ بکرێن".

لە راگەیێندراوەکەدا هاتووە "شاندی باڵای هاوپەیمانان پشتگیریی خۆیان بۆ هاوئاهەنگی نێوان هێزی پێشمەرگە و هێزی هاوپەیمانان و هێزە عێراقییەکان دووپاتکردەوە. رایانگەیاند، خوازیارن ئەو هاوئاهەنگییانە لە گشت ناوچەکان پەرەیان پێبدرێت. هەروەها دووپاتیانکردەوە، هێزەکانی هاوپەیمانان لە چاکسازی و هاوکاری و راهێنان بە هێزی پێشمەرگە بەردەوام دەبن".