به‌پێی هه‌واڵی کوردپرێس، ناوه‌ندی ڕاگه‌یاندن و چاپه‌مه‌نی یه‌کینه‌کانی پاراستنی گه‌ل (یه‌په‌گه) له به‌یاننامه‌یێکدا ڕای‌گه‌یاند که له کاتی پلاندانان بۆ هێرشکردنه سه‌ر ئه‌و هاوڵاتییه مه‌ده‌نییانه‌ی که هه‌وڵی ڕزگاربوون ده‌ده‌ن له ناوچه‌کانی ژێر ده‌ستی داعش، شه‌ڕڤانانی یه‌په‌گه و یه‌په‌ژه و هه‌سه‌ده له ئۆپه‌راسیۆنێکی تایبه‌تدا هه‌شت چه‌کداری بیانیی داعشیان له ناوچه‌کانی دێره‌زور ده‌ستگیر کردووه.
به‌پێی ڕاگه‌یه‌ندراوه‌که، ئه‌و چه‌کدارانه هه‌ڵگری ڕه‌گه‌زنامه‌ی (ئه‌مه‌ریکا، ڕووسیا، ئۆکرانیا، ئه‌ڵمانیا، کازاخستان، تاجیکستان و ئۆزبه‌کستان)ن و له ئێستادا گواستراونه‌ته‌وه بۆ شوێنێکی تایبه‌ت و ده‌ستبه‌سه‌رن.
ئه‌وه له کاتێکدایه ڕۆژی سێشه‌ممه‌ی ڕابردوو هێزه‌کانی سووریای دیموکرات، ده‌ستگیر کردنی پێنج چه‌کداری داعشی بیانییان له دێره‌زور ڕاگه‌یاند که دووانیان هه‌ڵگری ڕه‌گه‌زنامه‌ی ئه‌مه‌ریکیین و ئه‌وانی دیکه هه‌ڵگری ڕه‌گه‌زنامه‌ی ئێرله‌ندی و پاکستانیین.
سه‌رچاوه: سبه‌ی
کۆدی هه‌واڵنێر: 60103
Your Comment