به‌پێی هه‌واڵی کوردپرێس، په‌روین بوڵدان ھاوسه‌رۆكی ھه‌ده‌په له‌ كۆبوونه‌وه‌ی فراكسیۆنی پارته‌كه‌ی له‌ په‌رله‌مانی توركیا ‌ڕای‌گه‌یاند: ئه‌ردۆغان باس له‌ ئۆپه‌راسیۆنی سووریا ده‌كات به‌ڵام ئامانجی ئۆپه‌راسیۆنه‌كه‌ چاره‌سه‌ری نییه به‌ڵكوو قووڵكردنه‌وه‌ی قه‌یرانی سووریایه‌.

ناوبراو ئاماژه‌ی به‌وه‌ش كرد: ئه‌ردۆغان باس له‌ به‌ره‌نگاربوونه‌وه‌ی داعش ده‌كات، به‌ڵام كه‌س باوه‌ڕ ناكات و ھه‌موو جیھان ده‌زانێت ده‌سه‌ڵاتدارانی توركیا بازرگانیی نه‌وتییان له‌گه‌ڵ داعش كردوووه‌ و ھه‌موو جیھانیش ده‌زانێت ھه‌سه‌ده‌ داعشی تێكشكاندوووه‌.

بوڵدان ئه‌وه‌شی خسته‌ڕوو که‌ ده‌سه‌ڵاتدارانی توركیا، سووریایێكی ئارامی دیموكراتیان ناوێت به‌ڵكوو ده‌یانه‌وێ ئاڵۆزییه‌كان به‌رده‌وام بن و له‌و ڕێیه‌شه‌وه‌ ئه‌وان ده‌نگ و ده‌سه‌ڵاتدارێتیی خۆیان بپارێزن.

سه‌رچاوه‌: K24

کۆدی هه‌واڵنێر: 60103