به‌پێی هه‌واڵی کوردپرێس، ڕۆژی هه‌ینی 20ی کانوونی یه‌که‌می 2018 ڕه‌جه‌ب ته‌ییب ئه‌ردۆغان له وتارێكدا كه له شاری ئه‌سته‌نبۆڵ پێشکه‌شی کرد گوتی: "توركیا به‌هۆی بڕیاره‌كه‌ی ئه‌م دواییه‌ی ئه‌مه‌ریكا بڕیاری داوه بۆ ماوه‌یێک ئۆپه‌راسیۆنه سه‌ربازییه‌كه‌ی ڕۆژهه‌ڵاتی فورات ڕابگرێت."
سه‌رۆک کۆماری تورکیا گوتیشی: "په‌یوه‌ندییه ته‌له‌فۆنییه‌كه‌ی له‌گه‌ڵ دۆناڵد تره‌مپ سه‌رۆكی ئه‌مه‌ریكا و په‌یوه‌ندییه دیپلۆماسی و ئه‌منییه‌كانی نێوان هه‌ر دوو وڵات و لێدوانه‌كانی ئه‌م دواییه‌ی به‌رپرسانی ئه‌مه‌ریكا بوونه‌ته هۆی ئه‌وه‌ی وا له ئه‌نقه‌ره بكه‌ن بۆ ماوه‌یێک ئۆپه‌راسیۆنه‌كه دوابخرێت به‌ڵام ماوه‌كه كراوه نییه و دیاری كراوه."
ئه‌ردۆغان ڕه‌تی كرده‌وه توركیا چاوی بڕیبێته خاكی سووریا و ته‌ئكیدی كرده‌وه كه هه‌ڵوێسته‌كانیان ڕوون و تونده به‌رامبه‌ر ئه‌و هێرشه "تیرۆریستیانه"ی له سووریاوه ده‌كرێنه ناو خاكی توركیا."
ناوبراو ئاماژه‌ی به‌وه‌ش کرد که كاری له پێشینه‌ی توركیا ده‌سته‌به‌ركردنی ئاسایشی ناوچه‌كه‌یه و بۆ ئه‌و مه‌به‌سته هه‌نگاو ده‌نێین و له‌گه‌ڵ ڕووسیا و ئێرانیش كار بۆ ده‌سته‌به‌ركردنی ئه‌و ئامانجه ده‌كه‌ن.
میدیاكانی توركیا ئاماژه‌یان به‌وه داوه كه بڕیاره‌كه پاش په‌یوه‌ندییه ته‌له‌فۆنییه‌كه‌ی ئه‌م دواییه‌ی نێوان ئه‌ردۆغان و تره‌مپ دراوه، پاش ئه‌وه‌ی ئه‌نقه‌ره رایگه‌یاند ئۆپه‌راسیۆن بۆ سه‌ر ناوچه‌كانی رۆژهه‌ڵاتی فورات ده‌ست پێده‌كات.
سه‌رچاوه: K24
کۆدی هه‌واڵنێر: 60103
Your Comment