به‌پێی هه‌واڵی کوردپرێس، له شاری ھانۆڤه‌ری ئه‌ڵمانیا ڕێکخراوی نه‌ته‌وه یه‌کگرتوووه‌کان به‌شی ئه‌ڵمانیا کۆنفڕانسێکی له‌ژێر ناونیشانی ''ڕێگای به‌ره‌و ئاشتی''دا ساز کرد و له‌و کۆنفرانسه‌دا چه‌ندین دیدار و کۆبوونه‌وه ئه‌نجام دران و باس له ڕۆڵی هه‌رێمی کوردستان و هێزی پێشمه‌رگه‌ی کوردستان کرا له به‌ده‌ستهێنانی ئاشتی و سه‌قامگیریی ناوچه‌که‌دا.
شاندی وه‌زاره‌تی پێشمه‌رگه پێکھاتبوو له به‌ڕێزان سه‌ربه‌ست له‌زگین بریکاری وه‌زیر و فه‌ریق جه‌مال ئیمینکی سوپاسالاری هێزی پێشمه‌رگه‌ی کوردستان و لیوا سیروان بارزانی فه‌رمانده‌ی میحوه‌ری مه‌خموور- گوێڕ و عه‌مید ڕوکن ھه‌ژار عومه‌ر زه‌نگه‌نه به‌رپرسی په‌یوه‌ندییه‌کانی وه‌زاره‌تی پێشمه‌رگه و شاندی پارتییش پێکھاتبوو له ھۆشیار سیوه‌یلی به‌رپرسی په‌یوه‌ندییه‌کانی ده‌ره‌وه‌ی پارتی دیموکراتی کوردستان و فه‌وزی ئه‌سعه‌د جێگری به‌رپرسی لقی شه‌ش.
له کۆنفرانسه‌که‌دا بریکاری وه‌زاره‌تی پێشمه‌رگه وتارێکی ده‌رباره‌ی ڕۆڵی مێژوویی و خه‌باتی پێشمه‌رگه و دروست بوونی وه‌زاره‌تی پێشمه‌رگه و ڕۆڵیان له به‌رگری له کوردستان و تێشکاندنی داعش و دابین کردنی ئاسایش بۆ هه‌رێمی کوردستان به هه‌موو پێکهاته ئایینی و نه‌ته‌وه‌یییه‌کان و ملوێنان ئاواره‌وه پێشکه‌ش کرد و پاشان تیشکی خسته سه‌ر ئه‌و هاوکارییانه‌ی که پێشکه‌ش به هه‌رێمی کوردستان کراوه و گرنگییه‌که‌ی له دابین کردنی ئاسایش و سه‌قامگیریدا.
بریکاری وه‌زیری پێشمه‌رگه سوپاسی گه‌ل و حکوومه‌تی ئه‌ڵمانیای کرد له پشتیوانی و هاوکاریی هه‌رێمی کوردستان و مه‌شقپێکردنی هێزی پێشمه‌رگه و گوتیشی: به‌رده‌وام بوون و په‌ره‌پێدانی ئه‌و جۆره هاوکارییانه کاریگه‌ریی ده‌بێت له‌سه‌ر ده‌سته‌به‌رکردنی ئاشتی له ناوچه‌که‌دا.
دوایی فیلمێکی دۆکیومێنتاری ده‌رباره‌ی مێژووی کوردستان و هێزی پێشمه‌رگه که له لایه‌ن وه‌زاره‌تی پێشمه‌رگه‌وه ئاماده کرابوو، پێشکه‌ش کرا.
له پانێڵێکدا که لیوا سیروان بارزانی و ھۆشیار سیوه‌یلی و فه‌ریق جه‌مال و عه‌میدڕوکن ھه‌ژار به‌شدار بوون باسیان له بارودۆخی ئێستای کوردستان و داھاتووی هه‌رێمی کوردستان کرد و له کۆتاییدا دیاریی وه‌زاره‌تی پێشمه‌رگه به سه‌ر چوار که‌سایه‌تیی ڕێکخراوه‌که و ویلایه‌تی باشووری ساکسۆنیدا دابه‌ش کرا که ڕۆڵیان هه‌بوووه له ناساندنی هێزی پێشمه‌رگه و پشتیوانیی گه‌لی کوردستاندا.
کۆدی هه‌واڵنێر: 60103
Your Comment