به‌پێی هه‌واڵی کوردپرێس، ئه‌مڕۆ شه‌ممه‌ 15ی کانوونی یه‌که‌می 2018 حامی ئاکسۆی گوته‌بێژی وه‌زاره‌تی ده‌ره‌وه‌ی تورکیا ڕاگه‌یاندراوێکی بڵاو کردوووه‌ته‌وه‌ و تێیدا رایگه‌یاندوووه‌ که‌ "خاکی عێڕاق بوووه‌ته‌ بنکه‌یێکی سه‌ربازی بۆ په‌که‌که‌."

حامی ئاکسۆی هه‌روه‌ها رایگه‌یاندوووه‌: وڵاته‌که‌ی چه‌ندین جار حکوومه‌تی عێراقی بۆ گرتنه‌به‌ری ڕێکاری پێویست دژی په‌که‌که‌ ئاگادار کردوووه‌ته‌وه‌ به‌ڵام حکوومه‌تی عێراق "به‌رپرسیارێتیی خۆی جێبه‌جێ ناکات بۆیه‌ ئێمه‌ بنکه‌ و باره‌گاکانی په‌که‌که‌ له‌و وڵاته‌ بۆردومان ده‌که‌ین."

گوته‌بێژی وه‌زاره‌تی ده‌ره‌وه‌ی تورکیا جه‌ختی له‌وه‌ کردوووه‌ته‌وه‌ که‌ وڵاته‌که‌ی له‌ دژی تیرۆر هاوکاریی عێراقی کردوووه‌ و پێویسته‌ به‌غداش به‌ هه‌مان شێوه‌ "له‌ شه‌ڕی دژی تیرۆر" هاوکاریی ئه‌نقه‌ره‌ بکات.

حامی ئاسکۆی هه‌ڕه‌شه‌ی ئه‌وه‌شی کرد که‌ بۆردومانی فڕۆکه‌ جه‌نگییه‌کانی وڵاته‌که‌ی بۆ سه‌ر باره‌گاکانی په‌که‌که‌ له‌ عێراق و ناوچه‌ کوردستانییه‌کانی ده‌ره‌وه‌ی ئیداره‌ی هه‌رێمی کوردستان به‌رده‌وام ده‌بن.

شایانی باسه‌ شه‌وی 13ی کانوونی یه‌که‌می 2018 فڕۆكه‌ جه‌نگییه‌كانی توركیا هێرشیان کرده‌ سه‌ر بنکه‌ و باره‌گاکانی په‌که‌که‌ له‌ چیای شنگال و که‌مپی په‌نابه‌رانی مه‌خموور و ژماره‌یێک که‌س گیانیان له‌ ده‌ست دا و بریندار بوون و ڕۆژی هه‌ینی 14ی کانوونی یه‌که‌می 2018 وه‌زاره‌تی ده‌ره‌وه‌ی عێراق له‌ به‌یاننامه‌یێكدا سه‌ركۆنه‌ی هێرشی فڕۆکه‌ جه‌نگییه‌کانی توركیای بۆ سه‌ر بنکه‌ و باره‌گاکانی په‌که‌که‌ له‌ شنگال و مه‌خموور کرد.

کۆدی هه‌واڵنێر: 60103