بەپێی هەواڵی کوردپرێس، ڤیان سەبری لە لێدوانێکی بۆ ماڵپەڕی فەرمیی حزبەکەی ئەمڕۆ 9-2-2022 وتی، بڕیارە ڕۆژی یەکشەممەی داھاتوو دادگای باڵای فیدڕاڵی بڕیار لەسەر کاندیدی پارتی بۆ سەرۆککۆماری عێراق بدات و ڕایگەیاند: "دڵنیاین لە پاکیی کاندیدی خۆمان و بڕیارەکەی دادگاش ھەڵدەگیرێت".

ڤیان سەبری وتیشی، "ئەو بڕیارە کاتیەی لەلایەن دادگای فیدڕاڵیەوە لەبارەی کاندیدبوونی ھۆشیار زێباری دەرکراوە ھەڵدەگیرێت، دڵنیاین لەوەی کاندیدی پارتی ھیچ کێشەیەکی یاسایی نیە و ئەوەی بەرامبەری کراوە زیاتر سیاسیە، لەبەر ئەوەش دادگا پرسەکە یەکلا دەکاتەوە".

ناوبراو جەختیکردەوە کە "تاکە کاندیدی پارتی تا ئێستا ھەر ھۆشیار زێباریە بۆ پۆستی سەرۆککۆماری عێراق و لە پێشبڕکێ دەمێنێتەوە بۆ وەرگرتنی پۆستی سەرۆککۆمار".

سەرۆکی فراکسیۆنی پارتی وتیشی: "ئێمە لەنێو پڕۆسەی دیاری کردنی سەرۆککۆمارداین و ھەر کاتێک بڕیاری کاتی لەسەر کاندیدی ئێمە ھەڵگیرا لەلایەن دادگای باڵای فیدڕاڵی ئەوکات پارتی بڕیاری خۆی دەدات لەنێو ھۆڵی پەرلەمان بۆ دانوستان و دەمانبینن".