بەپێی هەواڵی کوردپرێس، شاندێکی دەزگای گشتیی کاروباری مین بەشداری 17ـیەمین کۆبوونەوەی وڵاتانی ئەندام لە رێککەوتنامەی قەدەخەکردنی بەکارھێنانی مینی دژە کەسی ناسراو بە رێکەوتنامەی ئۆتاوایە. کۆبوونەوەکە لە 26ـی دیسەمبەر دەستی پێکردووە و بۆ ماوەی پێنج رۆژ بەردەوام دەبێت.

سیراج بارزانی، سەرۆکی ده‌زگای گشتیی کاروباری مین لە حکوومەتی هەرێمی کوردستان بە تۆڕی میدیایی رووداوی رایگەیاند: "بەمەبەستی ئاگاداربوون لە دوا پێشھاتەکانی کاروباری مین لە ئاستی نێودەوڵەتی و پێشکەش کردنی چەند راپۆرتێک لەبارەی چالاکییەکانی دەزگای گشتی کاروباری مین، بەشداریمان لەو کۆبوونەوەیە کردووە".

سیراج بارزانی بە داتا کار و چالاکییەکانی دەزگاکەی خستەڕوو و رایگەیاند: "تیمەکانی ده‌زگای گشتیی مین، رووبەری حەوت ملیۆن و 414 هەزار و 199 مەتر زه‌ویی چوارگوشەیان له‌ مین و ته‌قه‌مه‌نییەکانی داعش پاك كردووەتەوە و 23 هەزار و 429 ته‌قه‌مه‌نیی جۆراوجۆریان پووچه‌ڵ كردووەتەوە".

سه‌رۆكی ده‌زگای گشتیی مین، لەبارەی پاشماوەکانی مین و تەقەمەنی کە لە سەردەمی حکوومەتی بەعس دانراون دەڵێ "لەلایەن حکوومەتی پێشووتری عێراقەوە رووبەری 776 کیلۆمەتری چوارگۆشە مینڕێژکرابوو، بەڵام ئێستا رووبەرەکە بۆ 270 کیلۆمەتر چوارگۆشە کەم کراوەتەوە، کە دەکاتە 65.2%ـی زەوییە لەمین پاک کراوەکان".

ده‌زگای گشتیی کاروباری مین لە سەرەتای شەڕی داعشدا له 2014 تاوەکوو 2017، سێ ژووری ئۆپەراسیۆنی لە شارەکانی دهۆک، هەولێر و گەرمیان بۆ هاوئاهەنگی لەگەڵ هێزەکانی پێشمەرگە پێکهێنا، بۆ پووچه‌ڵ كردنه‌وه‌ی مین و ته‌قه‌مه‌نییەکان.

کۆدی هەواڵنێر: 60113