بەپێی هەواڵی کوردپرێس، به‌گوێره‌ی راگه‌یه‌ندراوێکی نووسینگه‌ی راگه‌یاندنی سه‌رۆک وه‌زیرانی عێراق، ئه‌مڕۆ شه‌ممه مسته‌فا کازمی له په‌یوه‌ندیه‌کی ته‌له‌فۆنیدا له‌گه‌ڵ ئیبراهیم ره‌ئیسی په‌یوه‌ندیه‌کانی نێوان هه‌ردوو وڵاتیان تاوتوێ کرد و جه‌ختیان له‌سه‌ر فراوانکردنی هه‌ماهه‌نگی و هاوکاری نێوان هه‌ردوو وڵات له‌بواره جیاجیاکاندا کرده‌وه.
له ڕاگه‌یه‌ندراوه‌که‌دا هاتووه، له‌میانه‌ی ئه‌و په‌یوه‌ندییه‌دا ئیبراهیم ڕه‌ئیسی سه‌رۆک کۆماری ئێران ستایشی هه‌وڵه‌کانی عێراقی کرد بۆ نزیککردنه‌وه‌ی بۆچوونه‌کان و پته‌وکردنی ئارامی و ئاسایشی ناوچه‌که، هه‌روه‌ها سه‌رکۆنه‌ی هه‌ر کرده‌وه‌یه‌کی کرد که هه‌ر لایه‌نێک به‌ئامانجی ناسه‌قامگیرکردنی عێراق و ئاسایش ئه‌نجام بدرێت، به‌جۆرێک کاریگه‌ری له‌سه‌ر هه‌ڵوێسته هه‌رێمی و نێوده‌وڵه‌تیه‌کانی عێراق بکات.
له‌لایه‌ن خۆیه‌وه، مسته‌فا کازمی جه‌ختی له‌سه‌ر به‌هێزکردنی په‌یوه‌ندییه‌کانی نێوان عێراق و کۆماری ئیسلامی ئێران کرده‌وه و رایگه‌یاند، "عێراق ئاواته‌خوازه ئه‌م په‌یوه‌ندییانه فراوان بکات"، ئاماژه‌ی به‌گرنگیی ده‌ستپێشخه‌رییه هه‌رێمییه‌کان کرد که ئامانج لێی له‌یه‌کترنزیک کردنه‌وه‌ی بۆچوونه‌کانه.
Your Comment