بەپێی هەواڵی کوردپرێس، به‌گوێره‌ی راگه‌یه‌ندراوێکی نووسینگه‌ی راگه‌یاندنی ره‌وتی سه‌در، موقته‌دا سه‌در له ناوچه‌ی حه‌نانه‌ی سه‌ر به پارێزگای نه‌جه‌ف پێشوازیی له جینین پلاسخارت نوێنه‌ری سکرتێری گشتی نه‌ته‌وه یه‌کگرتووه‌کان له عێراق کرد و له‌باره‌ی ئه‌و بارودۆخه سیاسیه‌ی عێراق پێیدا تێپه‌ڕده‌بێت گفتوگۆ کرا.
له‌میانه‌ی کۆبوونه‌وه‌که‌دا، جینین پلاسخارت پیرۆزبایی له کوتله‌ی سه‌در کرد به‌بۆنه‌ی سه‌رکه‌وتنی له هه‌ڵبژاردنه‌کانی په‌رله‌مانی عێراق و جه‌ختیشی کرده‌وه، هه‌ڵمه‌تی هه‌ڵبژاردنی سه‌درییه‌کان سه‌رکه‌وتووه، هه‌ڵبژاردنیش وه‌ک پرۆسه‌یه‌کی دیموکراسی، سه‌رکه‌وتوو و سه‌رنه‌که‌وتوو به‌رهه‌م ده‌هێنێت، ئه‌مه‌ش نیشانه‌یه له‌سه‌ر مانا راسته‌قینه‌که‌ی پرۆسه‌ی دیموکراسی.
نوێنه‌ری نه‌ته‌وه یه‌کگرتووه‌کان له عێراق راشیگه‌یاندووه، ئه‌و هاوکارییه ته‌کنیکییه‌ی که نه‌ته‌وه یه‌کگرتووه‌کان پێشکه‌شی کردووه له‌سه‌ر داوای ده‌سه‌ڵات و ره‌وتی سه‌در و حکوومه‌تی عێراق و چه‌ند لایه‌نێکی دیکه‌ی سیاسی بوو، سه‌رپه‌رشتی کردن و به‌ڕێوه‌بردنی پرۆسه‌ی هه‌ڵبژاردنیش، له‌لایه‌ن کۆمسیۆنی باڵای هه‌ڵبژاردنه‌کانه‌وه باش و ته‌کنیکێکی سه‌رکه‌وتوو بوو.
له‌ڕاگه‌یه‌ندراوه‌که‌دا ئه‌وه‌ش خراوه‌ته‌ڕوو، موقته‌دا سه‌در و جینین پلاسخارت جه‌ختیان له‌سه‌ر گرنگیی په‌سه‌ند کردنی ئه‌نجامه‌کانی پرۆسه‌ی هه‌ڵبژاردنی په‌رله‌مانی عێراق کرده‌ووه به‌بێ دواخستن له‌لایه‌ن دادگای فیدراڵییه‌وه.
Your Comment