بەپێی هەواڵی کوردپرێس، ئەمڕۆ یەکشەممە 05-12-2021 مەسروور بارزانی، سەرۆکوەزیرانی هەرێمی کوردستان لە دیدارێكدا لەگەڵ ماتی لاسیلا، باڵیۆزی فینلەندا لە عێراق جەختی لە گرنگیی چڕکردنەوەی هاوئاهەنگی و هاریکاریی کۆمەڵگەی نێودەوڵەتی کردەوە بۆ رووبەڕووبوونەوەی هەڕەشەکانی داعش لە ناوچە کوردستانییەکانی دەرەوەی ئیدارەی هەرێمی کوردستان.

وەکوو لە راگەیێندراوی سەرۆکایەتیی حکوومەتی هەرێمی کوردستاندا هاتووە، مەسروور بارزانی سوپاسی فینلەندای کردووە کە لە چوارچێوەی هاوپەیمانیی نێودەوڵەتی دژ بە داعش، هاوکاری هێزی پێشمەرگەی کوردستانی کردووە بەتایبەتی لە بواری مەشق و راهێنانی سەربازی.

لە بەشێکی دیکەی راگەیێندراوەکەدا هاتووە، باڵیۆزی فینلەندا وێڕای ئاماژەدان بە رۆڵی ئەرێنیی رەوەندی کوردستانی لە فینلەندا، خواستی وڵاتەکەشی بۆ برەودانی زیاتر بە پەیوەندییەکانی لەگەڵ عێراق و هەرێمی کوردستان، بەتایبەتی لە بواری بازرگانی و وەبەرهێناندا دەربڕیوە.