به‌پێی هه‌واڵی کوردپرێس، مه‌سروور بارزانی له دیدارێکیدا له‌گه‌ڵ فراكسیۆنی پارتی باسی ئه‌ركی په‌رله‌مانتاران كرد و رایگه‌یاند: "ئه‌ركی قورستان له‌ئه‌ستۆیه چوونكه ده‌بێت له‌م خوله‌ی ئێستادا سیستمێک جێگیر بكرێت كه له خزمه‌تی كوردستانێكی به‌هێز بێت.
مه‌سرور بارزانی زۆر به بایه‌خه‌وه باسی له ژیان و گوزه‌رانی پێشمه‌رگه و خانه‌واده‌ی سه‌ربه‌رزی شه‌هیدان كرد و ئاماژه‌ی به‌وه دا: "پێویسته له‌م خوله‌دا زۆرترین كار بۆ ئاسووده‌ییی ژیانی پێشمه‌رگه و سارێژكردنی برینه‌كانی خانه‌واده‌ی سه‌ربه‌رزی شه‌هیدان بكه‌ن و ده‌بێ ئه‌م پرسه بخه‌نه پێشینه‌ی كاره‌كانتان".
هه‌ر له وته‌كه‌یدا مه‌سروور بارزانی باسی له ماف و ئه‌ركی هه‌موووان كرد و ڕای‌گه‌یاند: "هه‌موومان خاوه‌نی كوردستانین. ده‌بێت كار بۆ سڕینه‌وه‌ی فه‌رهه‌نگی لێک جیاكردنه‌وه‌ی هاووڵاتی و ده‌سه‌ڵات بكرێت و پێویسته كاری ئێمه ڕازی كردنی جه‌ماوه‌ر بێت نه‌ک ئه‌م و ئه‌و".
له درێژه‌ی قسه‌كانیدا مه‌سروور بارزانی جه‌ختی كرده‌وه: "پارتی بزووتنه‌وه‌یێكی جه‌ماوه‌رییه بۆ هێنانه‌دی مافه‌كان و ژیانێكی ئاسووده و خۆشگوزه‌ران بۆ جه‌ماوه‌ری گه‌لی كوردستان".
ناوبراو دووپاتیشی كرده‌وه: "پێویسته ده‌رفه‌تی یه‌كسان بۆ هه‌مووان بێ جیاوازی بڕه‌خسێندرێت. پێویسته وه‌ک ده‌سه‌ڵاتی یاسادانان و چاودێری كردنی ده‌سه‌ڵاتی جێبه‌جێ كردن له‌گه‌ڵ هه‌موو په‌رله‌مانتاران له كاركردندا هاوئاهه‌نگ بن".
سه‌رچاوه: K24
کۆدی هه‌واڵنێر: 60103
Your Comment