کوردپرێس:

پاش ئەوەی بۆ ماوەی چەند ڕۆژ شەڕێکی قورس لە ناوچەی هەجین و سووسە لە نێوان هێزی سووریای دیموکرات بە سەرکردایەتیی کورد لەگەڵ داعش ڕووی دا داعش توانیی خراپیی باری کەشوهەوا بقۆزێتەوە و هێرش بکاتە سەر هێزی کوردی سووریا و بەو هۆیەشەوە سوپای سووریای دیموکرات ناچار کرا لە ناوچەکە بکشێتەوە.

فەرماندەیێکی کوردی سووریا بە ڕۆیتەرزی وت هۆکاری پاشەکشێ کردنی هێزی سووریای دیموکرات ئەوە بوو داعش لە ناوچەی دەیرەزوور پێشڕەویی کردووە و هێزی سووریای دیموکرات لە ناچەکە هێزی عەرەبی لێنەهاتووی بەکارهێناوە و پاش ئەو هێرشەی داعش، کوردی سووریا دەستبەجێ هەستاوە بە قایم کردنی هێز و بارەگاکانی سوپای سووریای دیموکرات.

ئەو فەرماندە کوردە ئەوەشی وتووە کە هێزی تایبەتی سەر بە یەکینەکانی پاراستنی گەل (یەپەگە) و یەکینەکانی پاراستنی ژنان (یەپەژە) جووڵەیان پێکراوە و بەرەو دەیرەزوور نێردراون ئەوەش بۆ قایم کردنی سەنگەری هێزی سووریای دیموکرات لە ناوچەکە.

شۆن ڕایان وتەبێژی هاوپەیمانیی دژەداعش بە سەرۆکایەتیی ئەمریکا بە ڕۆیتەرزی وتووە مەسەلەی هێرش و بەرپەرچدانەوە لە شەڕ و لەدەستدان و دوبارە کۆنتڕۆڵکردنەوەی ناوچەیێکی تایبەت شتێکی ئاساییە لە شەڕدا و هێزی سووریای دیموکراتیش بە پشتیوانیی هاوپەیمانیی دژەداعش دیسان ئەو ناوچەیە کۆنتڕۆڵ دەکاتەوە.