کوردپرێس: بەپێی بەیاننامەیێکی روانگەی سووری بۆ مافەکانی مرۆڤ، ئەمڕۆ یەکشەممە 28/10/2018 فەرماندەیی هەسەدە رایگەیاندووە دوای حەوت هەفتە لە جەنگ لەگەڵ چەکدارانی داعش، هێزەکانی هەسەدە لە هەجین پاشەکشەیان کردووە.

هەجین شارەدێیێکی سەر بە پارێزگای دێرەزوورە لە رۆژهەڵاتی سووریا و کەوتووەتە رۆژهەڵاتی رووباری فورات و نزیک سنوورەکانی عێراق و لە سەرەتای شەڕی ناوخۆیی سووریاوە، لە دەست هێزەکانی رژێمی سووریا دەرهێندراوە.

کشانەوەی هەسەدە لەو شارەدێیە دوای هێرشی داعش دێت، کە رۆژی شەممە داعش بە سوودوەرگرتن لە خراپیی کەشوهەوا، کردییە سەر هێزەکانی هەسەدە و لە ئەنجامدا 60 شەڕڤانی هەسەدە گیانیان لەدەست دا و نزیکەی 100 شەڕڤانی دیکە بریندار بوون.

هەسەدە هێزێکی سەربازییە و بە پشتیوانیی ئەمریکا بۆ رزگارکردنەوەی ناوچە داگیرکراوەکانی کوردستانی سووریا لە رێکخراوی تیرۆریستی داعش، پێکهاتووە.

کۆدی هەواڵنێر: 60113