به‌پێی هه‌واڵی کوردپرێس، مایک پێنس جێگری سه‌رۆكی ئه‌مریكا ده‌ڵێت: "جینا هاسپڵ به‌ڕێوه‌به‌ری ده‌زگای هه‌واڵگریی ئه‌مریكی (CIA) به ‌مه‌به‌ستی لێكۆڵینه‌وه‌ له‌ كوشتنی جه‌مال خاشقچی ڕۆژنامه‌نووسی سعوودی له‌ توركیایه‌ و له‌ به‌ڵگه‌كان ده‌كۆڵێته‌وه‌. دوای ئه‌وه‌ی ته‌واوی ڕاستییه‌كان له‌ به‌رده‌ستماندا بوو، سه‌رۆک تره‌مپ به‌ له‌به‌رچاوگرتنی به‌هاكانی گه‌ل و به‌رژه‌وه‌ندییه‌ گرنگه‌ نه‌ته‌وه‌یییه‌كانمان بڕیارێک ده‌دات".

پێنس كوشتنی خاشقچی به‌ "هێرشێک بۆ سه‌ر ڕاگه‌یاندنی ئازاد و سه‌ربه‌خۆ" ناو برد و رایگه‌یاند که‌ حكوومه‌تی دۆناڵد تره‌مپ چاودێریی ئه‌و بابه‌ته‌ ده‌كات.

هاوكات پێنس باسی له‌ لێدوانه‌كه‌ی سه‌ركۆماری توركیا كرد له‌باره‌ی كوشتنی خاشقچییه‌وه‌ و گوتی: "ڕوونكردنه‌وه‌كه‌ی ڕۆژی سێشه‌ممه‌ 23ی تشرینی یه‌که‌می 2018 سه‌ركۆمار ئه‌ردۆغان له‌باره‌ی ئه‌وه‌ی كه‌ كوشتنی خاشقچی پێشتر پلانی بۆ داڕێژراوه به ‌ته‌واوی پێچه‌وانه‌ی ڕوونكردنه‌وه‌ و هه‌ڵسه‌نگاندنه‌كانی پێشووی سعوودیه‌یه‌."

مایک پێنس گوتیشی که‌ ئه‌مریکا هه‌وڵه‌کانی بۆ دادگه‌یی کردنی ئه‌نجامده‌رانی ئه‌م تاوانه‌ دڕندانه‌یه چڕ ده‌کاته‌وه‌.

سه‌رچاوه‌: ڕۆژنامه‌ی حوڕییه‌ت

کۆدی هه‌واڵنێر: 60103